Farmers Market, opisyal nga giablihan sa publiko atol sa ABRE GRANDE 2021
PALOMPON, Leyte – Napuno sa mga tawo ang Liberty Park dinhi sa lungsod sa Palompon, Leyte atol sa pag-abli sa Abri Grande Festival 2021 niadtong Nobyembre otso ning tuiga.
Dungan niini ang pormal nga pag-abli sa publiko sa Farmer’s Market dinhi sa lungsod nga tipik sa mga kalihukan sa Abri Grande ug kapistahan sa lungsod sa umaabot Disyembre tres ning tuiga. Ang Nobyembre otso usab ang adlaw sa paghandom sa ika-walo nga tuig sa pagkuso-kuso sa “Supertyphoon Yolanda” nga naghatag og kasakit sa katawhan sa lungsod.
Gipasiudahan sa Municipal Agriculture Office (MAO) sa Palompon ang Farmer’s Market diin gitambongan ang pag-abli niini ni Palompon Mayor Georgina Arevalo ug ubang mga opisyales sa lungsod.
Matud pa, gilunsad ang Farmer’s Market aron matabangan nga mapagaan ang kahimtang sa mga mag-uuma ug mga mananagat ning panahon sa pandemya. Tinguha usab niini nga matabangan ang ilang panginabuhi pinaagi sa pagbaligya sa ilang mga produkto sa lungsod sa hustong kantidad.
Lakip sa mga asosasyon nga mingsalmot sa Farmer’s Market mao ang Himarco Farmers Association, Tinubdan Palompon Farmers Association, Brgy. Hinagbuan Livelihood Farmers Association, San Pedro Farmers Association, San Guillermo Farmers Association, Magsaysay and Tabunok Rice Farmers SLP Association, Tambis Palompon Farmers Association, Taberna Farmers Association, ug uban pa.
Ang Farmer’s Market molungtad pa hangtod sa kapistahan sa lungsod karong umaabot Disyembre tres ning tuiga. (Hannah Reyes/DYDC-FM Intern)
