Department of Meteorology sa VSU, makigduyog sa World Meteorological Organization Day!

Makigduyog ang Department of Meteorology dinhi sa Visayas State University (VSU) sa pagsaulog sa World Meteorological Organization (WMO) Day.

Ang WMO usa ka ahensya sa United Nations nga gitugutang mobutyag sa kahimtang ug kalihokan sa atmospera sa kalibutan ug ang kalambigitan niini sa yuta ug kadagatan ug ang panahon sa matag adlaw, ang klima nga gihimo niini ug uban pa.

Ang petsa sa pagtukod niini, Marso baynte tres, mil nwebe syentos singkwenta, gitakda usab isip kasaulogan sa WMO Day.

Tungod niini, ipahigayon sa Department of Meteorology ang usa ka webinar nga giuluhang #WeatherWiser: A New Normal karong umaabot Marso baynte dos.

Ang maong webinar maghisgot sa mga topiko ubos sa tema sa WMO Day nga mao ang “The Ocean, Our Climate and Weather”.

Gikan pa sa Department of Science and Technology- Philippine Atmospheric, Geophysical and Astronomical Services Administration (DOST-PAGASA) ang tulo sa mga mamumulong sa webinar.  Si Weather Specialist Ana Clauren maghisgot sa iyang topic nga Severe Weather Phenomena in the Philippines, si Climatologist Ger Anne Marie Duran, motino sa kalainan sa Climate Change ug Changing Climate ug si Weather Specialist Romeo Ganal alang sa iyang topic nga “The Disaster Risk Reduction and Management in the Philippines: Challenges and Opportunities.

Dugang pa, imbitado usab si Dr. Janneli Lea Soria, usa ka faculty sa Central Visayan Institute Foundation nga maghisgot mahitungod sa Ocean-Land Interaction.

Nunot niini, gipahayag usab ni VSU Meteorologist Charlindo Torrion ang tumong sa ilang webinar ug gidapit ang tanan nga makig-uban sa ilang kalihokan.

“Isip pag-celebrate sa WMO Day, ang Department of Meteorology, magpahigayon og usa ka webinar, diin i-capacitate ang mga high school teachers nga nagtudlo og Life and Earth Science. Giimbitar namo tanan nga interesado labi na ang atong high school teachers kay sila parte sa paghimo sa atong nasud isip usa ka weather wiser nga nasud!”

Sigon usab ni Torrion nga ang mga interesadong moapil sa webinar, mahimong mag pre-register pinaagi sa opisyal nga facebook page sa ilang departamento, ang Department of Meteorology – Visayas State University. (Perlyn Fernandez)