IHK, maglunsad sa pinaka-unang virtual Fun Run – DYDC 104.7 FM
NewsNews

IHK, maglunsad sa pinaka-unang virtual Fun Run

Agi’g pagsaulog sa International Women’s Month karong buwan sa Marso, ang Institute of Human Kinetics IHK ug ang Gender and Development Office ning tunghaan magpahigayon sa pinaka-unang Virtual Fun Run.

Ang kalihukan nga gi-ulohang “Dagan Ghorl” nagdasig sa mga kababayen-an nga kawani sa VSU nga musalmot.

Mamahimong mupili ang mga partisipante kung mudagan kini sa tulo ka kilometro o lima ka kilometro nga fun run ug sila usab ang magbuot kung asa kini pagabuhaton.

Makapili usab sila sa ilang gusto nga oras sa pagdagan basta buhaton lang kini sulod sa alas dose ang takna sa kaadlawon sa Marso dise sais hangtod alas onse singkwentay nwebe sa gabie sa Marso dise otso.

Tungod kay virtual ang maong dagan, kinahanglan nga magdownload sa iyang smartphone ang partisipante og GPS-tracking running app.

Kini gamiton samtang nagkumpleto ang partisipante sa iyang usa ka session nga dagan. Human sa dagan, kinahanglan nga kuhaan niya og screenshot ang iyang GPS App nga nagpakita sa petsa, oras, ug gilay-on sa iyang pagdagan ug isumiter kini sa link nga gihatag sa mga organizer.

Adunay upat ka age category sa mga kababayen-an nga musalmot. Kini ang 31 years old and below category, 31-40 years old, 41-50 years old, ug 51-60 years old. Nagsugod ang registration sa mga partisipante niadtong Marso dose ug mahuman kini ugmang adlawa, Marso dise sais.

Angayang masayran nga mudawat ang mga organizers sa mga submissions hangtod Marso dise nwebe lang. Makadawat usab og ganti ang top 5 runners sa matag kategorya ug i-announce ang mga mananaog sa Marso baynte sais sa VSU IHK Facebook Page.

Sa dugang kasayuran, bisitaha ang Institute of Human Kinetics Facebook Page. (Buen Josef Andrade)