Pinaka-unang Vis-Min Oath-taking Ceremony sa mga licensed agriculturists, gipahigayon sa VSU

Malampusong gipahigayon ang Special Oathtaking dinhi sa Visayas State University alang sa mga Licensed Agriculturists nga mingpasar sa November 2019 Agriculturist Licensure Examination ug sa mga minglabay’ng mga eksaminasyon.

Gisugdan ang maong seremonyas sa alas tres sa hapon, kagahapon Enero trese didto sa VSU Convention Center diin muabot sa 246 ka mga agriculturists ang mingtambong gikan sa Visayas ug Mindanao.

Gikan sa 13,492 ka mga mangindahay nga ming-take sa exam, 5,538 lang o 41 percent ang nakapasar sa November 2019 exam. Dinhi sa VSU, 327 ang mga mingtake sa maong exam diin 182 niini ang mingpasar o nasa 56% ang institutional passing percentage.

Angayang masayran nga adunay duha ka mga board topnotchers ang VSU nga parehong nakakuha sa ika walong pwesto sa exam. Sila mao si Malvin Beti Datan ug Jane De Asis Entuna nga parehong nakakuha og score nga 87.83%.

Atol sa pagpakighinabi sa DYDC-FM News Team kang ni Dr. Rotacio Gravoso, Head sa University Review Center ning tunghaan nga maoy nag-organisar sa kalihukan, iyang gibutyag nga kini ang pinaka-unang higayon nga gipahigayon sa Visayas ang Oathtaking tungod kay sa mga minglabay nga katuigan, didto gyud ipahigayon ang oath-taking sa kaulohan.

Matud pa niya, kini gibuhat dinhi sa VSU sa pagpakigtambayayong sa Philippine Regulations Commission (PRC) sa Eastern Visayas aron mas mapaduol pa ang serbisyo sa PRC para sa mga board passers sa Kabisay-an ug Mindanao.

Gitambongan ang maong kalihukan sa mga opisyal sa VSU lakip na usab ni PRC Region 8 Director Narcival Randie Tanquiqui ug Philippine Association of Agriculturists (PAA) President Dr. Rosalina M. Lapitan.

Gawas pa sa Oath-taking Ceremony, pormal usab nga gi-induct sa Philippine Association of Agriculturists ang mga partisipante. Human sa maong seremonyas, gihatag na sa PRC ang mga lisensya sa mga bag-ong agriculturists.

Buen Andrade, Kalambuan News

Leave a Reply

Your email address will not be published. Required fields are marked *