Rice Ratooning: Pamaagi aron madugangan ang pangita sa mga mag-uuma
Gibutyag karon sa usa ka eksperto sa Visayas State University (VSU) nga mamahimong madugangan ang pangita sa usa ka mag-uuma hilabi na karong panahon sa COVID-19 Pandemic.
Atol sa DYDC Special Talk niadtong Hulyo otso ning tuiga, gibutyag ni Associate Professor IV Dr. Dionesio Bañoc sa Department of Agronomy sa VSU nga importante ang agronomy ug agronomic crops aron makab-ot ang food security. Kini hilabi na kay nagsagubang ang nasud ug kalibutan karon sa COVID-19 pandemic.
Si Bañoc nagkanayon nga naay daghang matang sa mga agronomic crops nga pwedeng matanom sa lain-laing matang sa yuta gikan sa lowland, hilly land, ug upland. Dugang usab niini nga pwedeng magtanom og mga field crops sama sa humay ug palayamanan sa lowland, legumes (mongos, mais, ug mani) sa hilly land, ug rootcrops o lagutmon sa upland.
Kining maong mga crops pwedeng matanom ug pwede usang idungan og patubo sa ubang mga pananom ug horticultural crops. Sa maong paagi, daghan ang abot ug adunay maani ug mabaligya ang mag-uuma.
Si Bañoc nagkanayon nga aduna usab siya ug ang Department of Agronomy nga nadebelop nga teknolohiya nga makatabang sa mga mag-uuma sa humay nga mao ang rice ratooning. Ang rice ratooning mao ang pagpadayon sa pagpatubo sa humay bisan pa man og naani na kini.
Ang rice ratooning mas economical ug aduna usay 40% nga abot gikan sa orihinal nga tanom diin wala na kini nagkinahanglan pa og bag-ong binhi ug magpreparar sa basakan.
Gikinahanglan lang ang hustong patubig ug pag-abono ug proper cultural management. Matud pa ni Bañoc nga kung ang mag-uuma magtanom sa buwan sa Disyembre ug maani sa buwan sa Marso sa sunod tuig, mamahimo na kining ma-ratoon ug maani hangtod sa buwan sa Mayo.
Gibutyag ni Bañoc nga ubay-ubay na nga mag-uuma ang nagsuway niining matang sa pagpang-uma ug malaumon siya nga sundon pa kini sa uban. Naglaum pa usab siya nga madugangan pa ang ilang pondo aron mas matun-an pa ang ubang aspeto sa rice ratooning. Gi-awhag sa eksperto ang mga mag-uuma nga ipa-analisar ang ilang mga yuta (soil analysis), aron masuta kung acidic ba kini ug aron masabtan kung unsa ang mga mineral ug nutrients ang kuwang sa yuta.
Gidasig ni Bañoc ang mga mag-uuma sa Rehiyon Otso nga magkugi sa pagpang-uma ug musuway sa mga bag-ong teknolohiya ug matang sa pagpang-uma. Nagpasalig usab si Bañoc nga andam nga mu-alagad ang Department of Horticulture sa teknikal nga aspeto.
