Kahinumduman nga sukad gideklarar ang community quarantine nunot sa COVID-19 ug gipapauli sa ilang tagsa-tagsa ka lugar ang mga estudyante, daghan pa nga mga gamit ang nahabilin.

Nunot sa mga estrikto nga border guidelines ug mga protocols sa VSU, naglisod pagkuha ang mga estudyante sa ilang mga gamit. Atol sa DYDC Special Talk radio program niadtong Agosto baynte siyete, gibutyag ni Dr. Villocino nga aduna nay mas kongkreto nga sumbanan ang mga estudyante aron makuha ang ilang mga gamit.

Matud pa, kinahanglan nga magpasabot ang mga estudyante nga nakapuyo sa mga dorms sulod sa VSU sa ilang mga dormitory advisers usa ka semana sa dili pa ipakuha ang ilang mga gamit. Kini aron masabotan ang husto nga schedule sa pagpanghipos ug pag-empake sa mga dorm advisers sa gamit sa okupante. Ang dorm adviser usab ag magpasabot kung kanus-a na makuha ang mga gamit. Nasayran nga ang dorm advisers lang ang otorisado nga mu-impake sa mga gamit sa okupante aron malikayan ang mga reklamo sa mga mawalang gamit.

Kinahanglan usab nga makig-communicate ang estudyante sa Office of the Dean of Students (kanhi USSO) sa tuyo niining magpakuha sa ilang gamit. Dugang ni Villocino nga ang tunghaan magtagana og TUYOK transport system aron mahakot ang mga gamit gikan sa dormitoryo ngadto padulong sa guard post diin didto mamahimo nang makuha sa okupante ang mga gamit.

Sa mga dili makasulod sa Baybay City border apan adunay mga kaila nga makasulod, mamahimo kining mokuha sa ilang mga gamit basta anaa lang kini ikapakita nga authorization letter.

Dugang pa, gibutyag ni Villocino nga ang University Supreme Student Council-Federation (USSCF) nagpahigayon na usab og survey sa mga boarding houses gawas sa VSU Campus aron masuta ang mga contact details ug impormasyon sa mga landlords aron usab makuha ang mga gamit sa okupante didto. Makig-koordinar usab ang OVPSAS sa Barangay Councils ug sa LGU Baybay diin nahimutang ang mga boarding houses.

Matud pa ni Dr. Villocino, dili mulapas sa napulo ka estudyante ang masilbihan matag adlaw.

The post Mga sumbanan sa pagkuha sa mga butang sa mga dorms ug boarding houses, gibutyag appeared first on DYDC 104.7 FM.

Atol sa DYDC Special Talk ning sibyaanan niadtong Hulyo uno, gibutyag ni VSU Vice President for Instruction Dr. Beatriz S. Belonias nga opisyal nga ablihan ang unang semestre sa tunghaan karong umaabot Agosto dise syete.

Sumala pa, sugod sa Agosto dise syete hangtod baynte otso, ipailawom ang mga magtutudlo o faculty hilabi na ang mga magtutungha sa serye sa mga webinars aron maandam sila sa new normal nga mga pamaagi sa pagkat-on nila pinaagi sa internet o online. Bansayon sila sa proseso sa ilang online o virtual classroom, sa paggamit sa ilang modules ug lakip na ang mga estratihiya aron magmalampuson ang ilang pagtuon online.

Ang online class sugdan sa mga buwan sa Setyembre ug Oktubre. Kini nagpasabot nga sa maong mga buwan, wala pay personal o face-to-face nga mga klase sa tunghaan.

Angayang masayran nga adunay duha ka mga pamaagi sa pagpahigayon sa klase online.

Mao kini ang Asynchronous Learning ug ang Synchronous Learning, depende sa masabutan sa mga magtutudlo ug mga estudyante.

Sa Asynchronous Learning, padayon nang giandam sa mga magtutudlo ang ilang mga virtual classroom (Moodle, Google Classroom, ug Edmodo) alang sa ilang mga subjects. Ang mga estudyante mahimong maka-access sa mga class material bisag asa ug bisan unsang orasa. Ang faculty ang magtakda og mga oras sa konsultasyon matag semana aron ma-monitor ang kauswagan sa pagtuon sa mga estudyante.

Samtang, ang Synchronous Learning alang sa mga klase nga minos ang magtutungha ug sa mga nagkuha og graduate programs sa VSU. Mahimong magtakda ang faculty og iskedyul alang sa iyang klase online uban ang iyang mga estudyante.

Sa laing bahin, gikonsidera usab sa VSU ang mga magtutungha nga walay access o kung aduna man, hinay ang internet connection.

Sigon pa ni Dr. Belonias, lakip gihapon ang offline sa ilang estratihiya sa flexible learning. Adunay printed courseware o nakaimprinta nga mga module o learning guide ang tunghaan nga ipang-apod-apod sa mga learning kiosks nga ipahimutang sa matag lungsod o siyudad. Didto kini kuhaon sa mga estudyante aron magamit nila isip study guide.

Samtang sa adunay mga gadget sama sa laptop ug tablet apan walay internet connection, maghatag og softcopy ang unibersidad ogmga kopya sa courseware nga mahimong ipadala pinaagi sa lainlaing mga elektronik nga paagi (e.g., email o cloud).

Naghinaot si Dr. Beloniaz nga makaangkon na og kalambuan bahin sa sitwasyon sa pandemya sa nasud ug sa rehiyon.

Kini tungod kay sa mga buwan sa Nobyembre ug Disyembre, gikatakdang ipahigayon ang mga laboratory class sa tunghaan diin kinahanglan ang face to face nga klase.

Isip lakang sa pag-amping, katunga lang sa populasyon sa mga estudyante o ubos pa niini ang nadesisyonan nilang mutungha sa matag buwan sa Nobyembre ug Disyembre.

Gitataw usab sa bise-presidente nga mga magtutungha nga 1^st, 4^th, 5^th ug 6^th year ang mobalik sa campus sa Nobyembre samtang ang mga 2^nd ug 3^rd year motungha sa musunod nga buwan niini.

Nunot niini, katunga ra usab sa kapasidad sa mga dormitoryo ug cottage ang mapanghimuslan karon nga semestre.

Sa dili palarong makasulod sa mga dormitoryo, nipasalig sila nga aduna nay kasabutan ang tunghaan ug mga boarding house operators nga modawat gihapon sila og mga estudyante nga mag-abang.

Sa pagkakaron wala pay tino nga plano ang VSU bahin sa mga rekisitos sa pagbalik sa mga magtutungha sama sa pagsigurong mopaubos kini og COVID-19 Test tungod sa sitwasyon sa pandemya. Apan, siguradong mopaubos ang tunghaan sa mga mandato o protocol nga ipatuman sa nasyonal ug lokal nga COVID-19 Inter-Agency Task Force.

The post Flexible Learning, gitanyag sa VSU sa pag-abli sa klase taliwala sa pandemya! appeared first on DYDC 104.7 FM.