Atol sa DYDC Special Talk ning sibyaanan niadtong Hulyo uno, gibutyag ni VSU Vice President for Instruction Dr. Beatriz S. Belonias nga opisyal nga ablihan ang unang semestre sa tunghaan karong umaabot Agosto dise syete.

Sumala pa, sugod sa Agosto dise syete hangtod baynte otso, ipailawom ang mga magtutudlo o faculty hilabi na ang mga magtutungha sa serye sa mga webinars aron maandam sila sa new normal nga mga pamaagi sa pagkat-on nila pinaagi sa internet o online. Bansayon sila sa proseso sa ilang online o virtual classroom, sa paggamit sa ilang modules ug lakip na ang mga estratihiya aron magmalampuson ang ilang pagtuon online.

Ang online class sugdan sa mga buwan sa Setyembre ug Oktubre. Kini nagpasabot nga sa maong mga buwan, wala pay personal o face-to-face nga mga klase sa tunghaan.

Angayang masayran nga adunay duha ka mga pamaagi sa pagpahigayon sa klase online.

Mao kini ang Asynchronous Learning ug ang Synchronous Learning, depende sa masabutan sa mga magtutudlo ug mga estudyante.

Sa Asynchronous Learning, padayon nang giandam sa mga magtutudlo ang ilang mga virtual classroom (Moodle, Google Classroom, ug Edmodo) alang sa ilang mga subjects. Ang mga estudyante mahimong maka-access sa mga class material bisag asa ug bisan unsang orasa. Ang faculty ang magtakda og mga oras sa konsultasyon matag semana aron ma-monitor ang kauswagan sa pagtuon sa mga estudyante.

Samtang, ang Synchronous Learning alang sa mga klase nga minos ang magtutungha ug sa mga nagkuha og graduate programs sa VSU. Mahimong magtakda ang faculty og iskedyul alang sa iyang klase online uban ang iyang mga estudyante.

Sa laing bahin, gikonsidera usab sa VSU ang mga magtutungha nga walay access o kung aduna man, hinay ang internet connection.

Sigon pa ni Dr. Belonias, lakip gihapon ang offline sa ilang estratihiya sa flexible learning. Adunay printed courseware o nakaimprinta nga mga module o learning guide ang tunghaan nga ipang-apod-apod sa mga learning kiosks nga ipahimutang sa matag lungsod o siyudad. Didto kini kuhaon sa mga estudyante aron magamit nila isip study guide.

Samtang sa adunay mga gadget sama sa laptop ug tablet apan walay internet connection, maghatag og softcopy ang unibersidad ogmga kopya sa courseware nga mahimong ipadala pinaagi sa lainlaing mga elektronik nga paagi (e.g., email o cloud).

Naghinaot si Dr. Beloniaz nga makaangkon na og kalambuan bahin sa sitwasyon sa pandemya sa nasud ug sa rehiyon.

Kini tungod kay sa mga buwan sa Nobyembre ug Disyembre, gikatakdang ipahigayon ang mga laboratory class sa tunghaan diin kinahanglan ang face to face nga klase.

Isip lakang sa pag-amping, katunga lang sa populasyon sa mga estudyante o ubos pa niini ang nadesisyonan nilang mutungha sa matag buwan sa Nobyembre ug Disyembre.

Gitataw usab sa bise-presidente nga mga magtutungha nga 1^st, 4^th, 5^th ug 6^th year ang mobalik sa campus sa Nobyembre samtang ang mga 2^nd ug 3^rd year motungha sa musunod nga buwan niini.

Nunot niini, katunga ra usab sa kapasidad sa mga dormitoryo ug cottage ang mapanghimuslan karon nga semestre.

Sa dili palarong makasulod sa mga dormitoryo, nipasalig sila nga aduna nay kasabutan ang tunghaan ug mga boarding house operators nga modawat gihapon sila og mga estudyante nga mag-abang.

Sa pagkakaron wala pay tino nga plano ang VSU bahin sa mga rekisitos sa pagbalik sa mga magtutungha sama sa pagsigurong mopaubos kini og COVID-19 Test tungod sa sitwasyon sa pandemya. Apan, siguradong mopaubos ang tunghaan sa mga mandato o protocol nga ipatuman sa nasyonal ug lokal nga COVID-19 Inter-Agency Task Force.

The post Flexible Learning, gitanyag sa VSU sa pag-abli sa klase taliwala sa pandemya! appeared first on DYDC 104.7 FM.

Atol sa DYDC Special Talk kang OIC Chief Librarian Mr. Vic A. Gilos, iyang gibtuyag nga aduna silay mga lakang nga gibuhat agi’g pagtuman sa mga health protocols sa tunghaan nunot sa hulga sa COVID 19.

Si Gilos nagkanayon nga inay upat ka library users ang mahimong mugamit sa usa ka table, usa na lang kini aron mamentenar ang social distancing. Gilimitahan na usab nila ang pagdawat og mga users ug ila kining ipadayon atol sa subling pag-abli sa klase. Gi-balhin usab ang entrance saLibrary gikan sa backdoor ngadto na sa main entrance aron mapatuman ang social distancing.

Apan gibutyag ni Gilos nga naa silay mga ubang paagi aron padayon nga maghatag og serbisyo sa mga library users. Usa niini ang paghimo og Facebook Page nga “VSU Library” diin mamahimong mucontact kanila ang mga library users sa tunghaan kung anaay gustong hugmon nga libro. Naghatag usab sila og mga links sa mga libre nga online resources sa mga nanginahanglan.

Anaa usab silay FB Group nga “VSU Library Enthusiasts” diin pwedeng maghimo og diskusyon ug magshare sa mga online references. Pwede usab mu-contact ang mga library users sa ilang email address library@vsu.edu.ph kung. Mamahimo usab nga mu-access ang mga faculty, staff ug estudyante sa online public access catalog (OPAC) sa tunghaan gamit ang http://destiny.vsu.edu.ph/ aron masuta kung naa bay mga sources ang VSU Library sa ilang mga gipangita nga subject.

Sa pagsunod sa New Normal ug sa mga bag-ong pamaagi sa pagtudlo nga mao ang online learning, distance learning, ug flexible learning, gisiguro ni Gilos nga paningkamotan nilang makahatag og tukmang serbisyo sa mga users.

Sa laing bahin, gi-awhag ni Gilos ang mga borrowers nga naabtan sa suspenso sa klase nga i-uli na ang ilang gihugman nga mga libro. Si Gilos nagkanayon nga walay fines nga kolektahon sa mga naabtan sa lockdown nga wala nauli. Ang kadtong mga wala na-uli sa wala pa ang lockdown niadtong Marso dose mao ray kwentahon. (Buen Josef C. Andrade)

The post VSU Library, adunay mga pagpangandam sa New Normal appeared first on DYDC 104.7 FM.