Ang exhibit tipik sa mga nakalinyang kalihukan sa VSU sa pagsaulog sa ika nobentay siyete nga tuig sa pagkatukod sa tunghaan gikan sa Abril baynte uno hangtod baynte otso. Ang exhibit period gisugdan kagahapon ug mahuman sa umaabot Mayo dise siyete ning tuiga.

Onse ka mga artists nga miyembro sa Visual Arts Association of Baybay kun VAAB, usa ka grupo sa mga artists nga nagtrabaho sa VSU ug sa dakbayan sa Baybay, ang nangulo sa maong group art exhibit.

Gisalmutan ang art exhibit nila ni Buen Andrade, Lolito Caña, Mizael Cerna, Dazzilyn Montes, Roger Pernites, Dicoper Pernites, June Nonie Sales, Bebot Flandez, Jessie Bonnie Bazalo, Marvin Alidro, ug Pauline Cari-Perez.

Mahimong makita ang mga artworks sa Facebook Page sa Visayas State University diin pwede kining mapalit sa reasonable nga presyo.

Angayang masayran nga parte sa kita sa mga mabaligya’ng artworks ihatag sa Tabang Mo Kaugmaon Ko scholarship program sa VSU Alumni Association Inc. pinaagi sa Alumni and Community Relations Office kun ACRO.

Sa iyang mensahe, gidasig ni VSU President Dr. Edgardo E. Tulin ang publiko nga musuporta sa art exhibit pinaagi sa pagpalit sa mga artworks o sa pagpasabot sa uban bahin ning maong kalihukan.

Sa iyang bahin, gidayeg usab ni kanhi Baybay City Mayor Carmen L. Cari ang lakang sa tunghaan sa pagpahigayon sa virtual art exhibit aron mapromote ang mga local artists, makahatag og scholarship, ug aron usab mapasabot sa publiko nga bisan pa man sa gi-atubang nga pandemya, anaa gihapoy pag-asa.

Angayang masayran nga namugna ang maong virtual art exhibit, sukwahi sa mga nanglabay nga face-to-face art exhibit, aron malikayan ang pagkatap sa COVID-19 virus. Sagad usab nga mga aktibidades sa VSU Anniversary gipahigayon pinaagi sa internet o online.

Kagahapon usab pormal usab nga gibuksan ang Flower and Garden Show ug Live online Selling as mga ornamental nga tanom.

Sa mga interesado nga mutan-aw sa mga artworks, mamahimo lang nga mu-bisita sa Official Facebook Page sa Visayas State University.  (Buen Josef C. Andrade)

The post Pinaka-unang Virtual Art Exhibit, gilunsad sa VSU appeared first on DYDC 104.7 FM.

Gipahigayon kagahapon, Marso dise siyete ning tuiga, ang judging sa Division-Level competition diin gilangkoban kini sa duha ka entries alang sa Teacher Category ug usa ka entry alang sa High School category.

Ang tema sa ikaduhang tuig sa National Arts Contest mao ang “Dakilang Lahi” diin tuyo niining mapasundayag ang mga dibuho o artworks sa mga estudyante ug mga magtutudlo sa DepEd ug mapakita ang ilang kahibalo sa panaghigalaay tali sa nasud sa Pilipinas ug Japan.

Sa maong judging, gideklarar nga mananaog ang entry ni Teacher Marvin Alidro sa Baybay I Central School ug anaa sa ikaduhang pwesto ang entry ni Teacher Dazzilyn Montes sa Baybay City Senior High School Standalone. Samtang nag-inusarang mananaog alang sa High School Category ang entry ni Elgin Cebreros.

Ang board of judges sa division-level competition gilangkuban nila ni Prof. Jude Nonie A. Sales, Mr. Mizael Cerna, ug Mr. Buen Josef Andrade sa Visayas State University kinsa usab mga miyembro sa Visual Arts Association of Baybay (VAAB).

Nunot niini, sila ni Alidro ug Cebreros ang murepresentar sa Baybay City Division sa high school ug teacher category alang sa Regional nga indigay.

Angayang masayran nga ang mga entries sa regional winners i-exhibit didto sa DepEd Central Office sa kaulohan gikan sa Abril hangtod Mayo ning tuiga.  Gitan-aw usab sa DepEd nga ang judging of entries ipahigayon sa buwan sa Mayo.

Ang national champion sa matag kategorya sa maong indigay makadawat og P500,000 samtang ang 1st runner up makadawat og P 150,000 ug ang 2nd runner up makadawat og ganti nga P50,000.  Aduna usay consolation price nga P3,000 sa mga non-winners sa national-level.

Ang Baybay Division-Level painting competition gipasi-ugdahan sa Enhancing the Skills and Enriching the Culture kun Project ESEC nga gipangulohan ni Dr. Joann Cerna-Rapada kinsa mao usab ang Educational Program Supervisor for MAPEH sa Baybay City Division.

Tumong sa Project ESEC nga mapalambo ug ipasundayag ang kultura sa dakbayan sa Baybay pinaagi sa local dances, songs, visual arts and other art forms.

Sa iyang bahin, malaumon si Dr. Rapada nga mas daghan pa ang mga musalmot nga mga magtutudlo ug magtutungha sa mga nasudnong indigay sa musunod nga mga katuigan ug mapasalamaton usab kini sa suporta sa VAAB sa mga kalihukan sa ESEC hilabi na ang pagpahigayon og libreng art workshops sa DepEd Baybay.

Buen Andrade, Kalambuan News

The post DepEd Baybay Division, mingsalmot sa usa ka National Arts Contest appeared first on DYDC 104.7 FM.