Paghimo og feasibility study, gipasayon sa software nga gidebelop sa usa ka VSU prof

Mas mapasayon na lang ang paghimo og feasibility study sa mga proyekto o negosyo pinaagi sa Bytex Feasibility Analyzer, usa ka computer software nga gidebelop ni VSU Agricultural and Biosystems Engineering Professor Arthur Tambong.

Atol sa “Pangutan-a si Engineer” radio program sa DYDC-FM kagahapon, Marso onse, ning tuiga, si Prof. Tambong nagkanayon nga importante ang feasibility study sa mga proyekto o negosyo aron masuta kung angayan ug magmalampuson ba kini, sa dili pa i-implementar.

Ang feasibility study usa ka report nga nagsuta sa usa ka proyekto o negosyo sa mga aspeto sa market, technical, financial, socio-economic, ug management. Tumong niini nga mahibalo-an kung praktikal, mabuhat, makaganansya, ug aduna bay benepisyo ang usa ka proyekto o negosyo. Apan ang tradisyonal nga paghimo og feasibility study usa ka makuting proseso ug mu-abot og mga semana o buwan sa paghimo sa report.

Atol sa Pangutan-a si Engineer Radio Program

Matud pa ni Tambong nga nadebelop niya ang maong software tungod sa kalisod og kadugay sa proseso sa paghimo niini. Sa maong paagi, mas matabangan niya ang mga pribadong indibidwal, mga kumpanya, ug mga gobyerno nga makahimo og mga feasibility studies.

Si Tambong nagkanayon nga namugna niini ang Bytex Analyzer niadto pa’ng tuig 1997 isip resulta sa training niini sa World Bank niadtong 1994 hangtod 1995. Ang maong software anaa na sa version 5.18.

Si Tambong nagkanayon nga daghang mga indibidwal, mga pribadong organisasyon ug mga grupo na ang minggamit sa maong software.  Mas sayon usab gamiton ang Bytex tungod sa speed, accuracy, ug convenience niini. Compliant usab ang software sa International Accounting Standards (IAS) ug International Financial Reporting Standards (IFRS).

Sa iyang bahin, gi-awhag ni Engr. Ma. Grace Sumaria nga kinahanglan gyud nga maghimo og feasibility study ang mga buot mag-implementar og proyekto o bisan ang mga small to medium nga mga negosyo aron sa pagsuta sa pagkapraktikal sa ilang mga negosyo.

Angayang masayran nga nakadawat na usab og mga pasidungog si Prof. Tambong sa gawas sa nasud tungod sa iyang gidebelop nga software ug nakigpartner na usab kini sa Bureau of Fisheries and Aquatic Resources (BFAR) aron sa pagbansay og daghang mga tawo sa paggamit sa Bytex.

Prof. Arthur Tambong, Bytex Developer

Samtang ang Bureau of Agricultural and Fisheries Engineering (BAFE) ang pinaka-unang ahensya sa gobyerno nga opisyal nga ming-gamit sa maong computer software niadtong Septembre 2020.

Malaumon usab si Tambong nga gamiton pa sa ubang ahensya sa gobyerno ang maong software ug daghan pa kini tawo nga ma-train sa paggamit niini.

Bytex User Interface

Mamahimong ma-download nga libre ang software sa maong link https://drive.google.com/open?id=1VIIawFOD7qKJSiYZyn6Ja3OZD8HVlHcs

Libre ang unang baynte ka calculation samtang anaay gamay nga bayad nga 40 pesos ang matag calculation.

Sa dugang kasayuran kabahin sa Bytex Feasibility Analyzer, mamahimong mupadala sa ilang mensahe ni Prof. Arthur Tambong sa iyang email: arthur.tambong@vsu.edu.ph (Buen Josef Andrade)