College of Management and Economics sa VSU, nagsaulog sa ika-siyam nga Anibersaryo

Miarangkada na ang College of Management and Economics kon (CME) dinhi sa Visayas State University (VSU) sa pagsaulog sa ilang ika-siyam nga founding anniversary.

Giablihan ang selebrasyon pinaagi sa usa ka Parade and Opening Program nga niadtong Marso kwatro ning tuiga diin gitambungan kini sa kapin kun kulang syete syentos ka mga magtutungha nga ubos sa CME.

Ang mga aktibidades nakalinya alang sa tema niini nga “Contesting Excellence through Competitive Higher Education in a Globalized Economy and Environment”.

Gilangkuban ang una’ng hut-ong sa ilang kasaulogan sa mga kalihukan sama sa Anniversary Convocation ug pipila ka mga kategorya sama sa Production Number ug Preliminary Question and Answer (Q and A) Portion sa Mr. and Ms. CME 2019.

Nasayran nga gipahigayon niadtong Marso singko ang 9th Anniversary Convocation sa CME. Si Industrial Policy Team- Action for Economic Reforms Coordinator Jenina Joy Chavez ang ilang guest speaker karong tuiga diin iyang gituki ang mahitungod sa Philippine Qualifications Framework (PQF). Usa kini ka nasudnong palisiya nga naghulagway sa lebel sa mga kwalipikasyon sa edukasyon ug nagtakda sa mga sumbanan alang sa qualification outcomes.

Samtang ang ikaduhang hut-ong sa ilang pag-selebrar magpadayon sa umaabot Marso baynte hangtod baynte dos, human sa Midterm Examinations sa VSU.

Langkuban usab kini sa mga kalihukan sama sa Trade Fair sa Ecopark, Business Pitch, Amazing Race, Talk on Tourism Ethics, Crowning of the Mr. and Ms. CME 2019 ug Closing Program.

Atol sa pagpakighinabi sa DYDC-FM News Team ni CME- Supreme Student Council (SSC) President Jamaica  Mueda, iyang gibutyag nga imbitahan nila ang mga managers sa mga nag-unang negosyo sa dakbayan sa Baybay sama sa Du Ek Sam Marketing alang sa ilang Business Pitch, usa ka indigay nila diin ipresentar sa mga estudyante ang ilang mga business ideas o business proposals.

Dugang pa ni Mueda, aduna usab silay ipanghatag nga cash prizes, groceries, flash drive, rice cooker ug cellphone alang sa mga palarong mabunot  sa ilang  raffle.

Iya usab gibutyag kung unsa ka mahinungdanon ang mao’ng kalihukan sa ilang mga estudyante nga ubos sa CME.

Hangyo ni Mueda ang hingpit nga kooperasyon sa mga mga magtutungha sa CME sa tanang mga aktibidad nga ilang giandam lakip na ang pakigduyog sa ubang mga estudyante ug mga kawani sa VSU sa ilang kasaulogan.

Angayang masayran nga ang pondo nga gigamit sa tibook nilang kalihukan gikan sa ilang income generating project diin ilang gibaligya ang raffle tickets nga nagkantidad og usa ka gatos ka pesos sa tanang estudyante nga ubos sa CME.

Ang CME  gilangkuban og tulo ka departamento nga mao ang Business Management, Economics, ug  Consumer Hospitality and Management lakip na ang usa ka research unit, ang Institute of Strategic Research and Development Studies.

====

Perlyn Fernandez, Kalambuan News.