Abaca Bunchy Top virus, pinakadakung problema sa mga Abaca Farmers sa Eastern Visayas

Nag-atubang karon og dakong kawad-on ang mga mag-uuma sa Abaca dinhi sa Silangang Kabisay-an tungod sa paspas nga pagkaylap sa Abaca Bunchy Top virus nga padayong nasinati ning tuiga.

Mao kini ang gibutyag ni Pest Management & Biotechnology, Assistant Professor Robelyn Piamonte, sa National Abaca Research Center kun NARC dinhi sa Visayas State University. 

Matud pa, ang Abaca Bunchy Top virus mao ang pinaka-delikadong sakit sa Abaca, ug kon dili mabantayan, dali ra kining mukaylap sa tibook plantasyon nga maoy hinungdan aron mangamatay ang mga pananom.

Nasayran nga niadtong tuig dos mil syete, dul-an sa dos mil kinyentos ka ektraya ang naapektuhan ug giguba niini sa mga plantasyon sa Baybay ug Sogod, Southern Leyte.

Dugang pa ni Piamonte, dako ang mawala sa kita sa mga local farmers ingon man ang tampo niini sa ekonomiya kon dili masugpo kining maong virus.

Kahinumdoman nga ang Silangang Kabisay-an mao’y numero uno nga producer sa Abaka dinhi sa Pilipinas sa wala pa mibutho ang maong sakit. Apan sa dihang nikaylap na kini, nahimo na lang ikatulo sa rango ang Eastern Visayas, nag-una ang Bicol ug ikaduha ang Mindanao.

Angayang masayran nga ang Pilipinas nagpabiling numero uno nga exporter og Abaca sa tibook kalibutan nga adunay ucheta y syete porsyento. Gisundan kini sa Equador nga adunay dose porsyento ug Costa Rica nga dul-an lamang sa usa ka porsyento. Apan naglisod na kita sa pag-abot sa demand tungod sa epekto niining Bunchy Top virus.

Cyril Montero, Kalambuan News!

Leave a Reply

Your email address will not be published. Required fields are marked *