VSU, subling gi-ablihan sa mga graduating students alang sa limited face-to-face classes – DYDC 104.7 FM
NewsNews

VSU, subling gi-ablihan sa mga graduating students alang sa limited face-to-face classes

Muabot sa 1,700 ka mga graduating students sa Visayas State University ang subling makasulod sa campus ning tunghaan alang sa inisyal nga pagpahigayon sa limited face-to-face classes sa nahabiling bahin ni’ng semester sa academic year 2021-2022.

Ang pioneer batch sa returning students tugtan nang makasulod sa tunghaan sugod karong adlawa, Marso baynte uno, human sa duha ka tuig dihang gi-anunsyo ang suspension of classes sa University Administrative Council atol sa pagsugod sa pandemya niadtong 2020.

Human sa pipila ka pakyas nga higayon nga subling ablihan ang tunghaan nunot sa duha ka COVID-19 variants ug sa kadaot sa Bagyong Odette, ang pamuno-an sa VSU opisyal na nga nagpahigayon sa face-to-face classes apan alang lang sa seniors ug graduating students.

Sigun pa ni Dr. Ma. Rachel Kim Aure, Director for Instruction and Evaluation, importante nga mahatagan og access ang mga 4th year students sa kahimanan ug laboratory sa VSU aron magpahigayon sa ilang mga theses, lab works ug on-the-job training.

Hinuon, ang lecture classes magpabilin gihapon nga flexible learning ug i-dumala sa VSU E-Learning Environment VSUEE pinaagi sa asynchronous ug synchronous mode of instruction.

Ang VSU nakakumpleto na usab sa mga rekisitos ug sumbanan sa Commission on Higher Education kun CHED. Nunot niini, ang mga graduating students kinahanglan usab nga fully vaccinated, adunay medical insurance, ug nagsumiter og affidavit of undertaking aron makasulod sa VSU Main Campus.

Dugang pa, nag-andam na usab ang tunghaan og mga kahimanan ug mga safety measures ug protocols alang sa pagpahigayon sa klase diin aduna usay lahing special student onboarding aron mapasabot ag palisiya ug sumbanan sa face-to-face classes.

Gawas pa sa CHED, nakigkoordinar na usab ang VSU sa pag-implementar sa limited face-to-face classes sa City Government of Baybay pinaagi sa local Interagency Task Force (IATF) against COVID-19.

Gikonsulta usab ang Department of Health (DOH) Eastern Visayas sa wala pa gi-ablihan ang face-to-face classes sa tanang campuses sa VSU system. (Orihinal nga sinuwat ni Neil Bryan B. Fulache/VSU Webteam)