VSU graduate, Top 1 sa Mechanical Engineering Licensure Exam 2022 – DYDC 104.7 FM
FeatureNewsNews

VSU graduate, Top 1 sa Mechanical Engineering Licensure Exam 2022

Nakuha sa Visayas State University VSU ang unang pwesto sa 2022 Mechanical Engineering Board Exams nga gipahigayon niadtong Pebrero ning tuiga. Ang resulta gipagawas sa Professional Regulations Commission kagahapon Marso siyete ning tuiga.

Gihataga’g pasidungog ni Engr. Mark Anthony S. Arcayan ang VSU dihang nanguna kini sa dul-an upat ka libo ka mga mangindahay sa mechanical engineering board exam.

Si Engr. Arcayan minggradwar niadtong 2020 isip Magna Cum Laude diin siya usab ang top graduate sa class VSU 2020. Siya usab kasamtangang nagtudlo sa Department of Mechanical Engineering dinhi sa VSU.

Si Engr. Arcayan (tuo) atol sa “Pangutan-a si Engineer” Radio Program niadtong 2020

Sa maong board exam aduna usay unom nga mga bag-ong mechanical engineers ang VSU nga nadugang sa mga successful examinees gikan sa VSU-Department of Mechanical Engineering. Ang VSU nakakuha og institutional passing rate nga 53.85%

Ang Mechanical Engineering Board Exams gipahigayon niadtong Pebrero baynte siyete hangtud baynte otso sa mga testing areas nga nahimutang sa Metro Manila, Baguio, Cagayan de Oro, Cebu, Davao, Iloilo, Legazpi, Lucena, Rosales, Tacloban ug Zamboanga.

Sa 3,780 ka mga mangindahay, 2,121 ang nakapasar sa board exam o 56.11 percent nga national passing percentage. (Buen Josef Andrade/DYDC-FM)