Relief operation sa usa ka charity group sa lungsod sa Hindang, ni-arangkada

Human sa kadaot sa pag-igo sa Bagyong Odette, paspas nga nakatigom og pondo ang Hindanganon Ko Bai charity group gikan sa nagkalain-lain nga donors nga anaa sab namuyo sa Hindang.  Ang mga Hindanganon nga mas labing apektado sa bagyo ang nahatagan sa gihimong relief operation.

Si Ms. Juna Villas, founder sa Hindanganon Ko Bai (HKB) charity group nagkanayon nga dili na niya maihap kung pila na ka relief packs ang naapod-apod sa mga katawhan nga nanginahanglan og pagkaon human sa bagyo. Matod pa niya, nga hangtod sa adunay muduol sa maong grupo para mangayog tabang iya kining paningkamutan og maayo para matabangan.

Dugang pa ni Ms. Villas, dako iyang pasalamat sa mga Hindanganon donors ug sa uban pang donors nga way hunong ug kinasing-kasing nga nitabang sa mga katawhan nga grabe nga naapektohan sa kalamidad.

Busa, ang maong charity group nakalikom og donasyon nga mingkantidad og P28,500 para lang maapod-apod sa sintos singkwentay-singko ka mga pamilya sa Brgy. Himokilan, Hindang, Leyte. Lahi pa niana ang uban pang donasyon para sa uban pang mga barangay sa maong lungsod.

Ang sulod sa maong relief packs mao ang bugas ug noodles apan nagdepende kini sa donors og unsa ang uban pang pagkaon nga iapil og nagdepende pud kini kung asa nga lugar kini ipangapod-apod.

Kanunayon nga magpahinumdom ang maong charity group nga dapat ipalabon ang panghatag sa relief packs sa mga katawhan nga mas nanginahanglan og tabang. Dili man kini daghan busa matod pa sa mga distribyutor sa relief packs dako na nga kalipay kini sa mga nahatagan og ayuda. (Kim Christine Boja/DYDC-FM Intern)