Relief operation sa programa nga Lakawan PH Cares, hapsay nga nagpadayun!
HINDANG, Leyte — Usa ka inila nga maestro slash youtuber ang nanguna sa paghimo og programa kun diin nahimo ang pagpang apod-apod og relief goods sa mga katawhan nga apektado sa bagyong Odette.
Ang personal blog nga gitawag og “Lakawan PH,” naghimo og usa ka programa nga ginganlan og “Lakawan PH Cares.” Kini gimugna ni Mr. Michael G. Suarez, usa ka maestro ug youtuber sa lungsod sa Hindang.
Ang maong programa padayun nga nanghatag og relief packs para sa ika-upat nga higayon, mao sab ang cash assistance alang sa mga pili nga indibidwal nga biktima sa kalamidad.
Gibutyag ni Mr. Suarez nga kinahanglan og dinalian nga tabang ang mga katawhan human niya masaksihan ang mga lugar nga grabi nga na-igo sa bagyong Odette, ug mao kini ang mga lugar sa Inopacan, Hindang, Hilongos, Bato, ug Matalom. Ang mga lugar sa probinsya sa Southern Leyte nga grabeng naapektohan mao ang Maasin City, Sogod, Bontoc, Tomas Oppus, Malitbog, ug uban pa.
Si Mr. Suarez nagkanayon nga matod pa sa iyang pakighinabi sa usa sa mga biktima sa bagyo, kadaghanan sa ilaha mas nanginahanglan og tabang aron mabalik ang ilahang mga panimalay. Kinahanglan kini og dako nga budget, inay ang pag apod-apod ug relief goods ang hingpit nga natabang sa nahisgutang programa.
Nakahatag og cash assistance worth 8,000 pesos ang maong programa sa usa ka bitkima sa bagyo nga taga Brgy. Abgao, Malitbog, Southern Leyte.
Ang “Lakawan PH Cares” inubanan sa mga donors ug sponsors gikan sa nagkalain-lain nga lugar, ug kini abli sa mga donors nga kasing-kasing ug andam nga mutabang sa katawhan nga apektado sa bagyong Odette. (Kim Christine Boja/DYDC-FM Intern)
