Taliwala sa bagyong Odette, charity group sa lungsod sa Hindang nanguna nga nanghatag og relief packs alang sa mga kabus

HINDANG, Leyte – Usa ka aktibo nga charity group sa lungsod sa Hindang ang padayon nga nanghatag og mga relief packs alang sa mga hindanganon nga apektado sa bagyong Odettte. Ang pagpang-apod-apod niini nahitabo sa niadtong Disyembre kinse, duha ka adlaw sa wala pa mulandfall ang bagyo.

Sa wala pa muabot ang bagyo, ang “Hindanganon Ko Bai” charity group hingpit na nangamdam og mga pagkaon sama sa bugas og noodles nga maoy gipanghatag sa mga katawhan hilabi na sa mga kabus nga anaa duol namuyo sa babayon.

Ang maong grupo adunay donors sa nagkalain-laing lugar lakip na ang mga Hindanganon ug pipila ka mga OFW’s, nga maoy aktibo nga nanghatag og pundo para sa budget nga maoy gigasto para sa relief packs.

Sigun pa ni Ms. Juna Villas, ang founder sa maong charity group sa gihisgutang lugar, nga sa napulo (10) ka tuig nga serbisyo sa maong grupo kanunay og andam nga mutabang sila bisan walay panghitabo nga kalamidad. Kini hilabi na sa mga kabus nga nanginahanglan sama sa pagkaon, pagrenovate sa mga naguba nga panimalay, gasto pangtambal sa mga masakiton, ug uban pa.

Dugang pa ni Ms. Villas, ang paagi sa pagtapok sa maong pundo para maoy itabang sa mga katawhan mao ang paagi sa pagpost sa facebook group nga adunay otso mil kapin nga miyembro nga gikan sa nagkalain-laing lugar.

Sa pagsuwat ni’ng balita, aduna nay dosintos sitentay-singko (275) ka mga relief packs gikan sa onsi ka sako nga bugas ug trese ka karton sa noodles ang nahatag  para sa mga katawhan sa hindang. Padayun pa gihapon nga manghatag ang maong charity group og ayuda human sa bagyo. (Kim Christine Boja/DYDC-FM)