Mga mulupyo sa Merida, gihatagan og ayuda alang sa panginabuhi-an

Nakadawat ning bag-ohay pa lang ang pipila ka mga mulupyo sa lungsod sa Merida og livelihood cash assistance nga gipang apod-apod sa lokal nga kagamhanan.

Ang maong ayuda nnaggikan sa Department of Social Welfare and Development kon DSWD diin nagkantidad og singko mil pesos ang madawat sa matag benepesyaryo. Usa kini ka programa sa DSWD aron mahatagan og igong tabang ang mga katawhan para sa pagpalambo o kaha pagtukod og negosyo isip panginabuhi-an nila.

Usa sa mga nahatagan sa maong lungsod si Mrs. Clarence F. Abangan, pamilyado ug usa ka mulupyo sa Brgy. Kinayaban, Merida, Leyte. Tungod sa nagkadaiyang panginahanglanon sa pamilya, mi-abag siya sa iyang bana sa pagpanginabuhi isip usa ka manikurista dinhi sa lungsod.

Kinahanglanon sa usa ka manikurista ang kompleto og insaktong gamit alang sa pagpanghinlo ug pagpagnindot og kuko. Dugang pa, kinahanglan usab niya ang personal protective clothing/equipment para sa luwas og hapsay nga pag-alagad sa iyang kliyente.

Ania ang tipik sa pakighinabi ni Mrs. Clarence kabahin sa iyang plano sa maong livelihood cash assistance nga iyang nadawatan. (Jelyn Tumulak/DYDC-FM Intern)