YOUTH IN AGRICULTURE PROGRAM, GIPAHIGAYON ALANG SA MGA SK CHAIRPERSONS SA DAKBAYAN SA BAYBAY – DYDC 104.7 FM
NewsNews

YOUTH IN AGRICULTURE PROGRAM, GIPAHIGAYON ALANG SA MGA SK CHAIRPERSONS SA DAKBAYAN SA BAYBAY

BAYBAY CITY—Usa ka agriculture program ang gimugna ning bag-ohay pa lamang para sa mga Sangguniang Kabataan (SK) Chairpersons sa nobentay dos ka mga barangay sa dakbayan sa Baybay.

Uban sa pagdumala sa City Youth Development Office sa lungsod pinaagi sa ilang coordinator nga si Honorable Mark Michael Unlu-cay, ang City Agriculture Office nanguna sa paghatag og technical assistance alang sa pagpalig-on sa kahibalo sa mga batan-on kabahin  sa programa sa agrikultura.

Isip pagkonsiderar sa pandemya, gibahin ang mga barangay sa dakbayan ngadto sa tulo ka clusters— ang East, North, ug ang Poblacion uban sa ilang lain-laing eskedyul alang sa seminar. Atol sa pagpahigayon sa programa, aduna say lain-laing mga kalihokan nga gipahigayon, sama sa farm visit ug technical demo.

Ang kalihukan tipik lang sa mga programa nga gipahigayon para sa Linggo ng Kabataan pagka-Agosto 12, niining tuiga.  Dungan usab kini sa International Youth Day nga adunay temang, “Transforming food systems: Youth innovation for human and planetary health”.

Matud pa kang  Hon. John Jade Montuya, SK Chairman sa Barangay Plaridel ug usa partisipante sa maong programa, ang mga butang nga ilang nakat-unan adunay dako nga bili para sad sila maka-edukar sa mga batan-on sa tagsa-tagsa nila ka barangay. “Dako jud ug tabang ang Youth in Agriculture program sa among mga SK Chairman kay pinaagi sa among mga nakat-unan, makahimo sad mi na moawhag sa youth diri sa amo lugar para mananom ug para makasabot jud sila sa value sa agriculture labi na karung pandemya”, segun pa ni Hon. Montuya. (Jessa M. Saladaga/DYDC-FM Intern)