Tabo-Tabo, gipahigayon sa Lungsod sa Merida
MERIDA, LEYTE- Pormal nang gilunsad niadtong Oktubre 31 ning tuiga ang Tabo-Tabo sa lungsod sa Merida diin nagkadaiyang abot sa uma, mga produktong dagat, ug uban pa ang mapalit sa hustong kantidad.
Ang maong akitibidad gipasiugdahan sa Municipal Agriculture and Fishery Council-Merida (MAFC-Merida) diin gisalmotan kini sa tanang sakop nga asosasyon sa lungsod
Tumong sa maong kalihukan ang paghatag og higayon sa mga lokal nga mag-uuma ug mananagat sa lungsod nga makabaligya sa ilang nagkalain-laing produkto sa pananom o uma, klase-klaseng isda, ug poultry products. Kini usab nag-awhag sa tanang lumulupyo sa Merida nga suportahan ang maong mga lokal nga paninda nga mapalit lamang sa baratong kantidad.
Abli ang Tabo-Tabo matag adlaw’ng Dominggo gikan sa alas-singko sa buntag hangtod alas-5 sa hapon diin nahimutang kini duol sa may Merida Food Park ug Merida Recreation Center. (Jelyn D. Tumulak/DYDC-FM Intern)
