RCEF-RFFA, gilunsad sa Leyte; 55,000 ka mag-uuma sa Rehiyon 8 makabenepisyo

Kapin sa singkwentay singko mil ka mga mag-uuma sa humay dinhi sa Silanganang Kabisay-an ang nakatakdang makapahimulos sa programa sa Department of Agriculture (DA) nga mao ang Rice Competitiveness Enhancement Fund – Rice Farmers Financial Assistance kun RCEF-RFFA.

Si DA Secretary William D. Dar nagkanayon nga ang cash assistance program gikan sa tres bilyones pesos nga sobra nga koleksyon sa mga taripa sa bugas.

Dugang pa ni Dar nga sa inisyal nga pondo, makabenepisyo ang kapin sa 600,000 ka kwalipikado’ng mag-uuma sa humay nga nagtikad og duha ka ektarya paubos. Ang matag usa makadawat og cash assistance nga singko mil pesos (P5,000).

Bisan pa niini, silang tanan kinahanglan gihapong marehistro sa updated Registry System for Basic Sectors in Agriculture (RSBSA), nga sagad gikan sa local government units (LGUs).

Dugang pa, ang cash assistance gipang-apud-apod pinaagi sa government financial institutions (GFIs) sama sa Development Bank of the Philippines ug LandBank nga mahimong mogamit og lain-laing paagi sa pag-apod-apod ug pagbayad sa RCEF-RFFA grants.

Sakop sa Rice Farmers Financial Assistance Program (RFFAP) ang 33 ka probinsya diin ang mga mag-uuma sa bugas naapektuhan sa pag-us-os sa presyo sa humay o wala gigaling nga bugas.

Subay niini, P385.2 milyones ang ipagawas para sa mga mag-uuma sa Rehiyon 8 pinaagi sa Development Bank of the Philippines ug sa Land Bank.

Kini nga mga detalye, gipahibalo ni Secretary Dar pinaagi sa usa ka video message nga gipasalida atol sa paglusad sa RCEF-RFFA nga gipahigayon didto sa Oriental Hotel, Palo, Leyte.

Hinuon, bisa’g masabot nga dili tanan makapahimulos niining unconditional cash grant, daghan gihapon ang mibati ug natandog sa kamatinud-anon sa kasamtangang administrasyon. Hilabi na tungod niini mamenosan ang gipas-ang kalisud sa mga mag-uuma nunot sa pandemya. (Jessa M. Saladaga/DYDC-FM Intern)