Pagpamakuna sa mga menor de edad, gipatuman na sa lungsod sa Palompon – DYDC 104.7 FM
NewsNews

Pagpamakuna sa mga menor de edad, gipatuman na sa lungsod sa Palompon

Gisugdan na usab sa lokal nga kagamhanan sa lungsod sa Palompon, Leyte ang pagpamakuna batok COVID-19 sa ilang mga kabataan nga nag-edad dose hangtod dise siyete anyos.

Ang maong lakang nahasubay sa mando sa Department of Health (DOH) niadtong buwan sa Septembre diin sugdan na pagpamakuna ang mga menor de edad sa tibuok nasud batok sa COVID-19.

Nunot niini, gi-awhag sa LGU ang mga ginikanan nga iparehistro ang ilang mga anak para mabakunahan, may comorbidity man o wala.

Niadtong Nobyembre onse ning tuiga gisugdan sa lungsod ang vaccination sa mga kabataan diin gipahigayon kini didto sa Dr. Manuel B. Veloso Memorial Hospital ning lungsod. Nagpadayon gihapon ang schedule sa mga pagpamakuna sa mga kabataan.

Matud pa, importante nga irehistro gayod daan ang mga bata aron malikayan ang kaguliyang sa adlaw sa pagpamakuna. Apan gitugotan gihapon ang mga walk-ins pero dili kini girekomenda para sa hapsay nga dagan sa pagpamabakuna.

Dugang pa, inig-abot sa ospital sa dili pa ihatag ang bakuna sa Covid-19, ang tigbakuna o nars kinahanglang susihon ang mosunod: (1) presensya sa gipirmahan nga gipahibalo nga pagtugot ug porma sa pagtugot, (2) presensya sa gipirmahan nga porma sa screening sa panglawas nga gi-clear sa health screener o pediatrician.

Gipasidan-an usab ang presensya sa ginikanan o tig-alaga, nga kinahanglang pisikal nga anaa sila sa panahon sa pagturok sa bakuna.

Gipahinumdoman usab nga dili kalimtan ang pagsuot sa face mask ug face shield, pagdala ug alcohol, tubig mainom, ug ball-pen. (Hannah Reyes/DYDC-FM Intern)