PAG-TAOD OG MGA SOLAR POWERED WATER PUMPS SA ISABEL, GISUGDAN NA
Gisugdan na karong buwana ang mga pag-instalar og mga Solar Powered Water Pumps sa mga hilit nga mga barangay sa lungsod sa Isabel. Ang maong proyekto gipatuman sa lokal nga kagamhanan sa Isabel isip tubag sa kakuwang sa tinubdan sa tubig sa maong mga barangay.
Lakip sa mga benepisyo sa paggamit sa solar nga mga bomba sa tubig mao ang ubos nga gasto sa operasyon niini tungod kay gipadagan kini gamit lang ang enerhiya sa adlaw.Ang mga solar nga bomba sa tubig nagpamenos sa paggamit sa kuryente mao nga environment-friendly kini tungod kay wala kini makagama og bisan unsang mga hugaw nga emisyon.
Sumala kang Hon. Marc Medina, konsehal sa Isabel base sa iyang Facebook post mahitungod sa proyekto, nga nindot gyud ang solar powered water pumping tungod kay dili na kinahanglan ang external power source. Ang kainit sa adlaw ug ang mga solar panel naghatag sa tanang kuryente nga gikinahanglan sa pagbomba sa tubig gikan ilalom sa yuta. Maong mapasaligon kaning maong proyekto nga makatabang gyud sa mga tawo nga nagpuyo sa mga secluded area.
Gibisita ning bag-ohay pa lang sa mga opisyal sa lokal nga kagamhanan ang mga lugar diin gibutang kining maong Solar Powered Water Pumps. Gi-sugdan na ug instalar ang water pumps sa Brgy. Monte Alegre, Anislag, Cangag, Consolacion, Puting Bato, Honan ug Binog diin sagad sa mga residente nagpadayag sa ilang problema sa tubig. Ang maong proyekto gilaumang mahuman ug epektibo nga magamit sa sunod tuig.
Nasayran nga ang nag-unang hinungdan sa kanihit sa tubig sa maong mga barangay mao ang kahilit sa dapit diin dili na kini maabot sa linya sa tubig ug sa nagtika-daghan nga mulupyo sa mga maong lugar.
Matud pa ni Joshua Casinillo, molupyo sa barangay Cangag, nga dakong tabang ang solar powered water pump hilabi na kay nagkinahanglan sila og igong suplay sa tubig sa ilang mga irigasyon, sa ilang hayupan, ug kabalayan. Sa iyang bahin, mapasalamaton usab si Mr. Diosdado, usa ka mag-uuma, tungod kay dakong tabang kini alang sa iyang basakan.
Tungod sa nag tika-init nga panahon karun, nag-atubang ang mga mag-uuma sa usa ka grabe nga kakulang sa tubig alang sa mga panimalay ug mga kalihokan sa agrikultura diin sila nag-antos sa kabug-at sa panahon sa pagpananom.
Dugang niini, ang dili maayo nga regulasyon sa basura sa agrikultura ug uban pang mga hugaw, pagkunhod sa populasyon, ug nagkadugay nga imprastraktura tanan nakatampo sa nagkadaghan nga mga insidente sa ubos nga kalidad sa tubig imnonon. Sa pagkakarun, wala pay gipagawas nga impormasyon sa kinatibuk-ang plano sa maong proyekto hilabi na kung pilay gitaganang budget niini ug sa gidugayon sa panahon para mahuman kini. Wala pa usab nagpahigayon ug pa-interview ang bisan kinsa nga LGU officials kabahin sa maong Solar Powered Water Pump Project sa matag barangay. (Glesrilken A. Generale/DYDC-FM Intern)
