Mga opisyales sa SK ug BHERT, gibansay mahitungod sa First Aid – DYDC 104.7 FM
NewsNews

Mga opisyales sa SK ug BHERT, gibansay mahitungod sa First Aid

Isabel, Leyte – Nagmalampuson ang First Aid Seminar and Training nga gidumala sa Philippine Red Cross alang sa Barangay Health and Rescue Team (BHERT) ug mga opisyales sa Sangguniang Kabataan (SK) sa Barangay Bilwang ning lungsod sa Isabel, Leyte.


Gipahigayon ang training niadtong Nobyembre 10 sa Brgy. Bilwang Gym nga tuyong mabansay ug mapa-usbaw ang kahibalo sa mga partisipante ug pag pangandam kung anaay health-emergency.


Ang maong aktibidad gipangunahan sa Kapitana sa Baranggay Bilwang nga si Hon. Lorlyn Aguisando ug Sanguniang Kabataan Chairman Remeluine Paje kauban ang mga volunteers sa Philippine Red Cross Leyte-Chapter. Ang maong kalihokan magsilbi nga training-ground para para sa serbisyong pampubliko, aron mahataganog saktong kahibalo ang lokal nga opisyales ug mga kabatan-onan sa saktong emergency response kung adunay mga posibleng insidente sa barangay.


Lakip sa mga gitudlo sa maong training mao ang Standard First Aid and Basic Life Support – Cardiopulmonary Resuscitation with Automated External Defibrillator, Occupational First Aid and Basic Life Support – Cardiopulmonary Resuscitation with Automated External Defibrillator, ug Emergency First Aid. Gipaambit usab ang Junior First Aid, Basic Life Support Cardiopulmonary Resuscitation, Basic Life Support Adult Cardiopulmonary Resuscitation for Lay Rescuers, ug Basic Life Support Child and Infant Cardiopulmonary Resuscitation Training.


Importante ug gikinahanglan nga mahibaw-an ang first aid hilabi na sa BHERT tungod kay isip first responders sa emerhensya, mahimo nilang matabang ug mamenosan nga mugrabe ang sitwasyon sa usa ka pasyente.


Sa pipila ka mga sitwasyon kung ang usa ka pasyente dili makadawat sa saktong pag-himo sa first aid diha-diha dayon ang ilang kahimtang mo grabe – kasagaran paspas ang maong pang hitabo. Pinaagi sa paghatag og first-aid mapalig-on nimo ang usa ka pasyente hangtod moabot ang Emergency Medical Services. Ang pagbansay sa First Aid naghatag kanimo ug pagsalig sa pag-apil sa pagtabang kung adunay emerhensya.


Usa si Rosemarie Apas, sekretarya sa Sangguniang Kabataan, sa mingsalmot sa maong training. Pra niya, importante nga naa silay kahibalo kung unsaon pag-responde sa panahon sa emerhensiya. Malipayon ug mapasalamaton usab siya nga nakabaton ug makapahimulos sa pribilihiyo sa pagkat-on ug pagsinati sa maong kalihokan, ug paghatag kaniya sa mahinungdanong kahibalo nga makatabang kaayo sa matag adlaw nga kinabuhi o sa emerhensya nga sitwasyon.


Sumala sa Facebook Post sa Red Cross Leyte-Chapter, gi-agni niini ang mga opesyales ug mga kabatan-onon sa barangay sa pagkat-on ug pag partisipar sa ilang health training-activity. Ang pagbansay sa first aid makatabang sa mga empleyado nga makat-on nga mas mahunahunaon sa kaluwasan sa trabahoan, nga mosangpot sa pagkunhod sa gidaghanon sa mga aksidente ug mga kadaot. Ang pagminus sa peligro sa mga trabahante ug ang pagkunhod sa mga insidente sa trabahoan usa ka kaayohan sa tanan.


Dugang pa, ang pagbansay sa first aid naghatag sa usa ka indibidwal sa husto nga pagsabut ug kahibalo nga nagtugot nga makit-an ang mga potensyal nga peligro ug mga aksidente nga pweding mahitabo. Kini nga kahibalo nagtugot usab nga mapugngan ug makunhuran ang gidaghanon sa mga aksidente, kadaot ug kalit nga mga sakit nga posibleng mahitabo. (Glesrilken Generale/DYDC-FM Intern)