Cash assistance alang sa piling mga negosyante sa Hindang, gimonitor ug ipalawig pag-usab

Hindang, Leyte – Nagpadayon ang pagmonitor sa usa ka gatos ug upat ka mga benepisyaryo sa Sustainable Livelihood Program sa Lungsod sa Hindang, diin gihatagn sila og tabang pinansyal o Livelihood Assistance Grants niadtong Oktubre katorse ning tuiga. Kini aron mapadayon ug mapalambo pa ang ilang mga negosyo taliwala sa kalisud sa kahimtang sa pandemya.

Tagsa-tagsa nga bisitahon sa mga in-charge coordinator sa maong programa ang mga benepisyaryo kutob Abril tuig dosmil baynte tres aron maobserbahan kung adunay maayung pagpalambo sa maong ayuda.

Nasayran nga ang mga Hindanganon nga nakadawat sa maong cash assistance mao ang pili nga mga SAP Beneficiaries ug 4Ps graduating grants.

Sigun pa ni Ms. Hazel Lotianes, usa ka Focal Person sa Livelihood Program, adunay mga sumbanan aron makapahimulos sa maong ayuda.

Ang benepesyaryo kinahanglan nga adunay negosyo sa wala pay pandemya sama sa pagpaninda og sud-an, barbekyuhan, sari-sari store, broiler production, ug uban pa.

Busa, ang kantidad sa kwarta nga nadawat sa mga benepisyaryo nagdepende usab sa klase sa ilang negosyo.

Dugang pa, usa ka maayung balita ang pagpalawig para sa ikaduhang batch sa maong Livelihood Assistance Grants og alang napud kini sa kwarentay nwebe ka mga grantees nga apil sa MIC Association nga gitukod ni Gov. Leopoldo Dominico “Mic” L. Petilla.

Angayang masayran nga hingpit na nga nangandam ang MSWD personnel para sa umaabot nga ikaduhang batch sa paghatag og ayuda. Mingpaubos na usab sa usa ka seminar ang mga musunod nga benepisyaro. (Kim Christine S. Boja/DYDC-FM Intern)