VSU, subling nakasulod sa Top 10 sa agricultural ang biosystems engineering board exam
Nakuha ni Engr. Ruel C. Lamberte, kasamtangang part-time instructor sa Department og Agricultural and Biosystems Engineering (DABE) ang ika-unom nga pwesto sa September 2021 licensure examination for agricultural and biosystems engineers.
Ang nag-inusarang topnotcher sa Visayas State University minggradwar niadtong 2020 ug nahimong magtutudlos sa DABE sukad Pebrero 2021.
Sa maong board exam aduna usay walo nga mga bag-ong agricultural engineers ang VSU nga nadugang sa mga successful examinees gikan sa VSU-DABE. Ang VSU nakakuha og institutional passing rate nga 41.67%.
Gawas pa kang Engr. Lamberte, nalakip usab sa listahan sa exam passers sila si:
Engr. Joey Niel D. Castil
Engr. Ramel R. Coletana
Engr. Jovan Matthew T. Costillas
Engr. Hazel Mae C. Gelay
Engr. Krystel Denice L. Labrador
Engr. Ada Mianie C. Pasana
Engr. Victorino H. Ruales Jr.
Engr. Myrla Mae B. Sintos
Engr. Virgil Mae P. Taghap
Matud pa ni Engr. Lamberte nga mapasalamaton siya sa Ginoo sa iyang nakab-ot nga kalampusan bisan pa man sa kalisod sa eksaminasyon. Iya usab gisaysay ang mga hagit nga ilang gisagubang nunot sa pandemya.
Sa iyang bahin, nagpadayag og kalipay si Engr. Eldon P. De Padua, ang bag-ong head sa VSU-DABE sa napulo ka bag-ong agricultural engineer sa VSU. Matud pa ni De Padua nga ang resulta sa maong eksaminasyon nagpadayag sa kalig-on sa instuction sa departamento.
Gikalipay usab ni VSU President Dr. Edgardo Tulin ang achievement sa VSU-DABE diin matud pa niya ang ABE ang usa sa mga pinakalig-on nga degree program sa tunghaan sa natad sa board exam performance.
Angayang masayran nga ang board of agricultural and biosystems engineering nagpahigayon sa eksaminasyon sa siyam ka testing areas nga nahimutang sa Manila, Baguio, Cagayan de Oro, Cebu, Davao, Koronadal, Legaspi, Tacloban, ug Tuguegarao.
Kini mao ang pinaka-unang higayon nga ang eksaminasyon gipahigayon sa Tacloban City diin sagad sa mga VSU graduates ang mingkuha sa ilang exam dinhi. (Orihinal nga sinuwat ni Neil Bryan B. Fulache)
