FeatureNews

East-West Center, gidayeg ang VSU sa pagpangulo sa SOA alang sa mga estudyante ug magtutudlo

Nagpadayag og pagdayeg ang mga opisyal sa East-West Center sa Visayas State University (VSU) sa pagtapos sa school-on-the-air (SOA) program on Visual Arts, Mental Health, and the Environment.

Atol sa virtual graduation sa SOA niadtong Agosto trayntay uno, gidayeg ni Christina Monroe, EWC Director of Alumni Engagement, ang tinguha sa SOA nga naka-angkla usab sa tinguha sa ilang buhatan nga tuyong mapalambo ug makabaton og kooperasyon sa Asia-Pacific Region.

Mapasalamaton usab ang EWC Alumni Engagement Director sa VSU sa pagpasiugda ning maong SOA program.

Sa iyang bahin, si EWC Senior Specialist Lance Boyd nagpadayag nga ang maong pagtambabayong tali sa EWC ug VSU nagpalig-on sa Innovation for Sustainable Development Fellows, usa ka programa nga iyang gimugna nga gi-ila sa United Nations (UN) nga nagpa-usbaw aron maabot ang sustainable development goals (SDGs).

Madasigon usab si VSU President Dr. Edgardo Tulin sa positibong resulta sa maong SOA ug nagpadayag og tinguha sa mga bag-ong programa nga mamugna nga susama sa buot nga makab-ot sa EWC.

Si Dr. Christina A. Gabrillo, VSU Development Communication Head ug ang nangulo sa SOA program, nalipay sa report nga nagpakita nga adunay pag-usbaw sa kahibalo sa 118 nga mga partisipante nga estudyante ug magtutudlo hilabi na sa aspeto sa mental health awareness ug mga konsepto sa environmental protection.

Dugang pa, ang mga magtutudlo ug estudyante nagpakita usab og pag-usbaw sa kahibalo sa visual arts nga mamahimo nilang epektibong coping strategies batok sa mental health problems.

Ang mga bag-ong art skills nakita usab nga magamit aron sa adbokasiya sa environmental conservation ug protection sa mga partisipante.

Atol sa virtual graduation, nagpresentar ang duha ka Division Offices sa Department of Education (DepEd) sa Eastern Visayas sa ilang sustainability plan. Si Dr. Raul Agban nagpresentar alang sa Baybay City Division samtang si Dr. Liza Demetrio nagpresentar sa Southern Leyte Division alang kang Dr. Genis Murallos.

Isip paghatag og balor sa dedikasyon sa mga radio school learners, giila ang mga top-performing nga estudyante ug magtutudlo nga nagsilbi usab og co-facilitators ug on-the-ground coaches sa SOA program.

Gidomenar sa Southern Leyte Division ang top-performing students ug teachers diin nasakmit niini ang tanang tulo ka top awards sa duha ka kategorya.

Sa student awardees, nakuha ni Al Christian Escol ang SOA class valedictorian, Angelo Siman ang ikaduhang pwesto, ug Honeylyn Macapagong ang ikatulong pwesto.

Alang sa mga teacher awardess, si Roy Estrella ang nakakuha sa unang pwesto, gisudan nila ni Rosaio Imboc ug Carmelita Maturan sa ika-duha ug ikatulong pwesto.

Ang tanang mga manananog nakadawat og medalya, certificate gikan sa VSU ug EWC ug kwarta nga ganti nga nagkantidad og Php5,000, Php3,000, and Php2,000 sa top 3 students ug teachers.

Ang radio school on visual arts, mental health, and the environment usa training program nga mingdagan og unom ka semana ug gisibya sa VSU Radio DYDC-FM ug sa Facebook Live sa official page sa tunghaan.

Ang EWC ang nagpondo sa maong programa diin gi-implementar kini sa mga faculty members sa Department of Development Communication sa VSU. Kini na ang ikaduhang proyekto sa EWC nga gi-implementar sa DDC diin ang una mao ang participatory production sa usa radio drama kabahin sa disaster preparedness.