Lain-laing variants sa COVID-19, na-detik sa rehiyon otso! – DYDC 104.7 FM
NewsNews

Lain-laing variants sa COVID-19, na-detik sa rehiyon otso!

Subay sa pahayag sa Department of Health Eastern Visayas Center for Health Developments (DOH EVCHD) nga aduna nay kaso sa rehiyon sa labing makatakod nga Delta Variant sa Covid-19, gikompirma usab sa ahensya nga adunay uban pang COVID-19 variants of concern nga na-detik dinhi sa Silangang Kabisay-an.

Naglakip kini sa 3 ka kaso sa Alpha Variant or B.1.1.7 nga unang namatyagan didto sa United Kingdom, 7 ka mga kaso sa Beta Variant or B.1.351, unang nabantayan sa South Africa ug 1 na sad ka kaso sa Delta Variant o B.1.6.1.7 nga unang namatyagan didto sa India ug 7 ka mga kaso sa Variant Under Investigation P.3 nga unang na-detect naman dinhi sa Pilipinas.

Ang maong mga kaso gikan pa sa susamang set sa 214 nga mga sample nga gipadala sa Philippine Genome Center alang sa sequencing taliwala sa mga buwan sa Hunyo ug Hulyo.

Ang DOH EVCHD, pinaagi sa Surveillance and Epidemiology Unit niini, nagpahayag nga ang tanan nga mga kaso giisip nga locally transmitted tungod kay walay travel history gawas sa rehiyon ang mga indibidwal nga nakitaan sa maong mga kaso.

Ang tulo ka Alpha Variant cases gikan sa dakbayan sa Ormoc, Tacloban ug probinsya sa Eastern Samar, diin nagpangidaron ang mga indibidwal gikan sa edad nga 37 hangtod 52 anyos.

 Samtang, ang mga kaso sa Beta Variant nakaapekto sa mga indibidwal nga nagpangidaron og 6 ngadto sa 71 katuig. Sa 7 nga mga kaso, ang 3 gikan sa Western Samar, ang 2 gikan sa Eastern Samar, 1 gikan sa Northern Samar, ug ang 1 ka kaso gikan sa Biliran.

Sa inisyal nga 10 nga gitahong mga kaso sa Delta Variant sa rehiyon, ang Surveillance team sa ahensya nakadawat na usab og laing kaso sa maong variant of concern didto sa Borongan City, Eastern Samar. Ang maong kompirmasyon gihatag sa DOH Epidemiology Bureau niadtong milabayng semana nga nagdala sa sa kinatibuk-ang kaso sa Delta Variant sa rehiyon ngadto sa 11.

Sa 7 usab nga nakumpirma nga kaso sa Variant Under Investigation P.3, 2 niini gikan sa Western Samar, 2 usab gikan sa Eastern Samar, 1 gikan sa Tacloban City, ug 2 nga kaso gikan sa Ormoc City.

Nunot niini, gihatagag gibug-aton sa DOH EVCHD ang kamahinungdanon sa aktibo nga pagmonitor sa kaso, pagbantay, ug pagsubay o pagcontact trace niini hangtod sa ikatulong henerasyon sa tanan nga nakumpirma nga mga kaso aron makontrol ug mapugngan ang pagkanat sa virus.

Sigon pa, kinahanglanon kini tungod kay ang Hospital Utilization Rate sa mga ospital sa rehiyon apektado sa pagdagsan sa mga kaso nga COVID-19.

Sa pagkakaron, ang Hospital Utilization Rate sa Ormoc City gipaubos na sa High Risk Level, Moderate Risk  alang sa Tacloban City ug sa Samar, ug ang uban naa pa sa lebel sa Low Risk.

Dugang pa, gipasabot usab sa ahensya ang kamahinungdanon sa pagbakuna sa prayoridad nga grupo, angA2 (mga tigulang) ug A3 (mga tawo nga adunay nagpahiping kahimtang) tungod kay labing peligro kanila ang COVID-19.

Perlyn Fernandez, Kalambuan News.