VFES, nagdalit og Summer Fun Class alang sa mga kabataan
Maayong balita alang sa mga elementary pupils dinhi sa dakbayan sa Baybay!
Nagdalit karon ang Visca Foundation Elementary School kun VFES og mga academic ug skills development classes alang sa mga magtutungha ning dakbayan aron mahimong mas mahinungdanon ang ilang summer break.
Ang Summer Fun Class 2021 gilangkuban sa Academic Classes sa Reading and Writing ug Mathematics. Samtang ang Skills Development Class nagdalit og mga klase sa Dancing, Singing, Guitar ug Arts.
Atol sa DYDC Special Talk Radio Program kagahapon, gibutyag ni VFES Principal Ms. Corine Sacro nga gipahigayon nila ang maong summer classes aron mas matabangan pa ang mga kabataan sa pagdebelop sa ilang mga talento sa pagsayaw, pagkanta, pagbuhat og arts, ug pagpatukar og gitara.
Ang ilang academic classes usab makatabang sa mga kabataan nga nag-edad og tres anyos pataas nga makahibalo sa pagbasa og pagsuwat ug mas madebelop pa ang kaalam sa mga elementary pupils sa Math.
Sa iyang bahin, gibutyag ni VFES Teacher Ms. Daisy Telen nga nagsugod na ang registration alang sa Summer Fun Class diin P500 lang ang registration fee. Ang kinatibuk-ang balayrunon sa matag estudyante muabot og P2000 lakip na niini ang registration fee.
Nasayran nga ang academic classes idumala sa mga magtutudlo sa VFES samtang ang mga skills development classes idumala sa mga eksperto gikan sa Visayas State University.
Ang Dance Class dumala-on nila ni Mr. Jovel Aberilla ug Ms. Anna Beth Varron. Ang Singing Class dumala-on nila ni Mr. Josselle Cayetano ug Ms. Elena Guy-ab. Ang guitar lessons pagadumala-on nila ni Engr. James Lesidan ug Mr. Buen Andrade samtang ang Art Class idumala ni Prof. Jude Nonie Sales.
Gipasabot usab ni Ms. Telen nga ang Art ug Guitar Classes abli sa mga estudyante nga anaa sa gawas sa VSU. Tungod kay face-to-face ang mga klase, gisiguro ni Telen nga nagsunod ang VFES sa mga health protocols aron masiguro ang kabataan batok sa COVID-19. Sa katapusan sa klase, adunay ipahigayon nga recital ang mga entrante.
Magsugod ang Summer Fun Class sa umaabot Hunyo baynte uno. Sa dugang detalye mahimong mu-like ug follow sa Facebook Page sa VFES nga Visca Foundation Elementary School. (Buen Josef Andrade)
