Office of the Dean of Students sa VSU nagpasiugda sa Student Services Days
Gipasiugdahan sa Office of the Dean of Students (ODS) nga gipangulohan ni Prof. Manolo B. Loreto, Jr. ang pagsaulog sa “Student Services Days” niadtong Mayo beynte sais hangtud beynte nueve niining tuiga taliwala niining New Normal. Gisalmutan kini sa mga tinun-an sa tibuok Visayas State University System.
Atol sa pag-abli sa maong programa, gibutyag ni Dr. Aleli A. Villocino, ang Vice President for Student Affairs and Services sa VSU, nga ang unibersidad magpadayon sa pagpaduol ngadto sa mga estudyante niini pinaagi sa online platforms. “Bisan unsa nga paagi makakat-on ra gyud ang mga estudyante, mapa-face-to-face man kini o bisan pa pinaagi sa flexible learning nga mao karon ang gisugyot sa Commission on Higher Education (CHED), matud pa ni Dr. Villocino.
Siya midugang sa pag-ingon nga ang unibersidad nagpadayon gihapon sa pagtutok ug paghatag sa mga estudyante sa kalidad nga edukasyon aron sila magmalampuson sa ilang mga tinguha. Kini usab aron makab-ot nila ang dekalidad nga higher education taliwala niining global health nga krisis.
Samtang, si VSU President Dr. Edgardo E. Tulin mipadayag ngadto sa mga estudyante nga bisan pa nga anaa sila sa flexible nga pamaagi sa pagtuon, ang unibersidad nagpadayon gihapon sa pagserbisyo kutob sa iyang mahimo alang sa kalambuan sa mga estudyante. Iya usab gipasabot nga ang VSU andam kanunay sa pag-abag ug pagsanong sa mga panginahanglan sa mga tinun-an niining unibersidad. Pinaagi sa Student Services Days, mabati sa mga estudyante nga ang unibersidad anaa ra gyud kanunay tungod ug alang kanila.
Sa laing bahin, gisaysay ni Prof. Loreto ang mga nagkadaiyang serbisyo ug mga program nga gipasiugdahan sa iyang opisina, sama sa guidance and counseling program, atol sa iyang pagbatbat mahitungod sa “Delivery of Student Services in the New Normal.” Atol usab sa maong programa, si Atty. Rysan C. Guinocor, ang Chief Leagl Officer sa VSU, mibatbat sa “Student Discipline in an Online Learning Environment.”
Nunot niini, gihimo usab ang nagkalain-laing webinars sama sa Financial Literacy, Talk on Career Pathways and Global Opportunities, Managing Anxiety in an Online Learning Environment, ug ang Coping with Depression and Anxiety kauban ang mga eksperto nga mipahaum sa ilang mga topiko ug dali ra masabtan sa mga estudyante.
Aron magpabilin nga madasigon ang mga estudyante, gihimo ang nagkalainlaing indigay nga gilangkuban niining mosunod kauban ang mga mananaug diin sila nakadawat og ganting salapi: Spoken Poetry Contest winners – Gerald Cataag (first), Karl Justin Segales (second), ug Cris Sheena Romo (third); Digital Poster Making Contest winners – Rodrigo Bantilan (first), Jeffrey Allan Lagua (second), ug Raymund Llanita (third); Handmade Poster Making Contest winners – Kim Joffet Laming (first), Jorge Garpa (second), ug Jamaica Sumaylo (third); ug ang kataposang indigay mao ang Throwback USSO Days Photo Contest diin si B-ver Olimberio mao ang miguwang manaug, gisundan ni Jorge Garpa, ug ang ikatulong ganti nakuha ni April Chiong.
Ang mga kalihokan gipahigayon pinaagi sa zoom, usa ka online platform, aron kini makit-an live sa mga katawhan ilabi na sa mga estudyante nga kanunay nagasunod sa FB page sa VSU. (Sinuwat ni Fred Leander M. Baldos, VSU-IHS HUMSS Student Intern)
