Grand Alumni Homecoming sa VSU, ipahigayon online – DYDC 104.7 FM
FeatureNewsNews

Grand Alumni Homecoming sa VSU, ipahigayon online

Ipahigayon na karong umaabot Hunyo baynte singko hangtod baynte sais ning tuiga ang Grand Alumni Homecoming sa Visayas State University. Apan tungod sa nahitabong COVID-19 pandemic, ipahigayon kini online.

Ang pinaka-unang virtual alumni homecoming gipasiugdahan sa Alumni and Community Relations Office (ACRO) sa pagpangulo ni Prof. Elsie Salamat ug sa mga host batches gikan sa Freshman Batch 1980 ug 1986, Freshman batch 1981 ug ERHS class 1997.

Atol sa Serbisyo Estudyante Radio Program ning sibyaanan sa milabay’ ng semana, gibutyag ni Prof. Elsie Salamat nga ang tanang kalihukan pagahimuon online gamit ang Zoom ug ang Facebook Live. Adunay link nga ipagawas ang VSU ACRO Facebook Account alang sa libreng registration diin mamahimong magparehistro ang tanang alumni sa VSU.

Si Prof. Salamat nagkanayon nga nabahin sa lima ka sessions ang duha ka adlaw nga kalihukan. Sa unang adlaw, ipahigayon ang Opening Program sa alas nwebe sa buntag hangtod sa alas dose sa udto. Sunod nga session mao ang Updates sa Alumni Association nga ipahigayon sa alas tres hangtod alas singko sa hapon.

Sa gabie ipahigayon ang Alumni Talent Showdown sa alas sais hangtod sa alas nwebe diin daghang mga pa-kontest ug prizes nga pwedeng madaog. Sa ikaduhang adlaw ipahigayon ang fitness and fun sa alas siyete hangtod alas onse sa buntag. Ang closing program ipahigayon sa alas tres hangtod sa alas singko sa hapon.

Gi-awhag usab ni Salamat ang tanang mga alumni sa VSU nga magpadala sa ilang mga hulagway diin makita ang mga iladong landmarks sa ilang nahimutangan aron pagpakita nga ang mga VSU alumni anaa sa nagkadaiyang dapit sa nasud ug kalibutan. Ang mga hulagway mamahimong ipadala sa acro@vsu.edu.ph aron malakip kini sa video presentation.

Gidasig usab ni Prof. Salamat ang tanan nga mutambong sa virtual alumni homecoming ug mu-donate sa mga fund-raising projects sa VSU Alumni Association Inc.

Angayang masayran nga tungod sa COVID-19 pandemic, wala gipahigayon ang Alumni Homecoming sa milabay’ng tuig. (Buen Josef Andrade)