Free online registration alang sa VSU Virtual Alumni Homecoming, nagpadayon
Nagpadayon pa gihapon ang free online registration alang sa VSU Virtual Grand Alumni Homecoming nga ipaghigayon karong umaabot Hunyo baynte singko hangtod baynte sais ning tuiga. Karong tuiga, ang tema sa kalihukan mao ang “Coming Home to VSU: Beyond Borders Amidst the Pandemic”.
Mamahimong makuha ang link alang sa free registration sa Facebook Page nga “Visayas State University Alumni Updates”.
Ang pinaka-unang virtual alumni homecoming gipasiugdahan sa Alumni and Community Relations Office (ACRO) sa pagpangulo ni Prof. Elsie Salamat ug sa mga host batches gikan sa Freshman Batch 1980 ug 1986, ug sa freshman batch 1981 ug ERHS class 1997.
Ang duha ka adlaw nga kalihukan nabahin sa lima ka sessions. Sa unang adlaw, ipahigayon ang Opening Program sa alas nwebe sa buntag hangtod sa alas dose sa udto. Sunod nga session mao ang Updates sa Alumni Association nga ipahigayon sa alas tres hangtod alas singko sa hapon.
Sa gabie ipahigayon ang Alumni Talent Showdown sa alas sais hangtod sa alas nwebe diin daghang mga pa-kontest ug prizes nga pwedeng madaog. Sa ikaduhang adlaw ipahigayon ang fitness and fun sa alas siyete hangtod alas onse sa buntag. Ang closing program ipahigayon sa alas tres hangtod sa alas singko sa hapon.
Dugang pa, nagsara na kagahapon ang pagpandawat og entries alang sa Virtual Vocal Solo ug Vocal Duet Singing Contest ug TikTok Dance Challenge.
Gi-awhag usab ni Prof. Salamat ang tanang mga alumni sa VSU nga magpadala sa ilang mga hulagway diin makita ang mga iladong landmarks sa ilang nahimutangan aron pagpakita nga ang mga VSU alumni anaa sa nagkadaiyang dapit sa nasud ug kalibutan. Ang mga hulagway mamahimong ipadala sa acro@vsu.edu.ph aron malakip kini sa video presentation. (Buen Josef C. Andrade)
