1st National Higher Education Day sa Rehiyon Otso gisaulog dinhi sa VSU
Gisaulog sa Philippine Association of State Universities and Colleges (PASUC) Eastern Visayas Chapter ang pinaka-unang National Higher Education Day niadtong Mayo dise nuebe ning tuiga, dinhi sa sa Visayas State University (VSU).
Kini adunay tema nga “PADYAK” ‘Moving Forward, Claiming Victory for Philippine Higher Education, Pamantasan: Pandayan Tungo sa Kaunlaran’. Ang VSU maoy nagsilbing host sa maong panagtigum tungod kay ang pangulo ning unibersidad nga si Dr. Edgardo E. Tulin mao usab ang pangulo sa PASUC 8.
Ang maong kalihukan tipik sa kasaulogan sa ika-27 nga anibersaryo sa Commission on Higher Education (CHED) diin tanang mga unibersidad ug kolehiyo sa tibuok nasud nga naghatag og tertiary education sakop niini.
Sa iyang pakigpulong, gibutyag ni Tulin nga ang tema haum kaayo sa selebrasyon diin gihatagan niini og igong pagtagad ang mga nakab-ot sa CHED sa milabayng baynte siyete ka tuig.
Malipayon usab nga gidawat ni Dr. Tulin ang responsibilidad isip host sa maong okasyon hilabina kay siyento por ciento sa mga presidente sa napulo ka mga state universities and colleges sa rehiyon otso ang mitambong ning kasaulogan.
Siya usab mipadayag sa iyang kalipay sa tawong nagpasiugda niining 1st National Higher Education Day Celebration nga si Dr. J. Prospero Popoy De Vera III, ang CHED Chairperson. Iya usab gipadangat ang iyang kalipay sa amahan sa dakbayan sa Baybay nga si Mayor Jose Carlos L. Cari kauban ang Local Interagency Task Force sa positibo niining pagsanong sa iyang hangyo ug nagmalampuson ang maong kasaulogan samtang hugtanon nga gipatumon ang mga protocols sa lokal nga kagamhanan.
Samtang, gibutyag ni CHED Chairperson De Vera ang mga gimbuhaton ug uban pang mga plano sa CHED ubos sa iyang administrasyon nga naay kalambigitan sa higher and advanced education sa atong nasud.
Atol usab sa maong programa, gipasundayag ang mga nagkadaiyang gimbuhaton sa mga tertiary education institutions sa Eastern Visayas taliwala niining pandemya ug ingon man usab ang mga talento sa mga tinun-an sa nagkalain-laing unibersidad.
Gipahigayon usab ang usa ka webinar nga giulohan “Are You Willing to Take the Shot?” Kini mahitungod sa vaccination sa COVID-19 diin si Dr. Adelito D. Posas, lumad nga Baybayanon, mao ang pinasidunggang mamumulong. Iyang gibutyag kon unsa ka importante ang pagpabakuna.
Atol usab sa maong panagtigum, gihimo ang launching sa Eastern Visayas Higher Education Institutions Flexible Learning Management Consortium’s Search for Outstanding Flexible Teachers in Eastern Visayas.
Ang maong kalihokan gitambungan sa mga dagkong opisyales sa lain-laing tulonghaan sa atong rehiyon nga gipangulohan sa mga mosunod nga mga presidente: Biliran Province State University – Dr. Victor C. Cañeza, Jr.; Eastern Samar State University – Dr. Andres C. Pagatpatan, Jr.; Leyte Normal University – Dr. Evelyn B. Aguirre; Eastern Visayas State University – Dr. George M. Colorado, CHED Regional Director ug mao usab ang Officer-in-Charge; Northwest Samar State University – Dr. Benjamin L. Pecayo; Samar State University – Dr. Marilyn D. Cardozo; University of Eastern Philippines – Dr. Chery I. Ultra; Southern Leyte State University – Dr. Prose Ivy G. Yepes; Palompon Institute of Technology – Dr. Norberto C. Olavides; ug ang Visayas State University – Dr. Edgardo E. Tulin.
(Sinuwat ni Fred Leander M. Baldos, VSU-IHS HUMSS Student Intern)
