Silot sa mga dili musunod sa Plastic Reduction Ordinance, gipasabot! – DYDC 104.7 FM
News

Silot sa mga dili musunod sa Plastic Reduction Ordinance, gipasabot!

Girilis na sa Baybay City Environment and Natural Resource (ENR) Office ang mahimong penalty sa mga Baybayanon nga mapakyas og tuman sa Plastic Reduction Ordinance sa dakbayan.

Nasayran nga sa maong ordinansa dili na mohatag o magbaligya og mga single-use plastic ang mga tindahan dinhi sa mga adlawng Martes ug Sabado sa matag semana sugod sa Mayo kwatro, dos mil baynte uno.

Gilangkuban kini sa mga plastic nga ice-wrapper, roll bags, plastic utensils, Styrofoam ug uban pa.

Pinaagi sa usa ka video presentation nga ilang gi-upload sa ilang official facebook page karong adlawa, gitataw ang mga silot nga maangkon sa mga tindahang dili musunod niini:

Sa labing unang higayon sa pagkapakyas, kumpiskahon ang plastik sa tindahan ug makabayad sad kini og kinyentos ka pesos.

Sa second offense, kompiskahon gihapon ang plastic ug makabayad og usa ka libo ka pesos.

Sa third offense, mosaka na sa tres mil ka pesos ang multa uban sa pagkumpiska sa plastik.

Samtang, sa tindahang padayong molapas sa ordinansa, magbayad na kini og kwatro mil ngadto sa singko mil ka pesos ug ikanselar ang business permit niini sulod sa usa ka tuig.

Sa laing bahin, aduna sad silay gitugutan nga exemptions sa ordinansa lakip na niini ang paggamit og plastik alang sa mga emergency relief operations ug paggamit og polyethylene bags alang sa mass production sa mga seedling.

Exempted usab ang mga ospital ug mga healthcare facilities alang sa sanitasyon nga mga katuyoan.

Sa pagkakaron, nagpadayon ang Baybay City ENR sa ilang information campaign aron masigurong masayod ang mga Baybayanon sa maong ordinansa.

Gipahayag usab nila ang ilang pagpasalamat ngadto sa mga mamamalit nga nagdala na og kaugalingon nilang reusable bags sa ilang pagpangompra bisan wala pa gipatuman ang Plastic Reduction Ordinance.