Kampanya alang sa "No Plastic Days" sa Baybay, miarangkada na! – DYDC 104.7 FM
NewsNews

Kampanya alang sa “No Plastic Days” sa Baybay, miarangkada na!

April 6, 2021

Miarangkada na ang Ecological Solid Waste Management Council dinhi sa dakbayan sa Baybay sa ilang information campaign bahin sa ordinansang NO PLASTIC DAYS sa mga adlawng Martes ug Sabado sa matag semana nga ilang ipatuman sunod buwan sa Mayo kwatro, dos mil baynte uno.

Photo from Baybay City Updates FB Page

Tipik kini sa implementasyon sa City Ordinance Number 7 series of 2013 o Plastic Bag Reduction Ordinance diin ang mga tindahan hilabi na ang Public Market dili na mohatag o magbaligya og mga single-use plastic nianang mga adlawa.

Kini nagpasabot nga kinahanglan nang magdala og kaugalingon nga bag, bayong, basket, eco-bag ug uban pa, kung mamalit sa bisan asa’ng tindahan dinhi sa matag adlaw’ng Martes ug Sabado.

Matod pa sa opisyal nga facebook page sa Baybay City Environment and Natural Resource (ENR) Office, gisugdan na nila ang pagpang-apod-apod og mga Information, Education and Communication (IEC) materials sa dagkong mga establisamento sa dakbayan sama sa Prince Hypemart ug sa Metro Baybay.

Ila usab gipatawag ang tanang traders sa syudad nga sagad mogamit og plastik nga iputos sa ilang mga baligya.

Matod pa, usa ka buwan nilang buhaton ang information campaign aron masigurong masayod ang mga Baybayanon sa maong ordinansa.

Angayang masayran nga ang maong ordinansa usa ka pamaagi aron maibanan ang nagkadaghang mga basura nga dili malata dinhi sa dakbayan hilabi na kay napuno na og mga plastik nga basura ang Temporary Residual Containment Area nga gihimo sa Baybay Local Government Unit samtang wala pa nahuman ang ilang gihimong Sanitary Land Fill.

Sa laing bahin, ilang gipaabot ang ilang dakong pasalamat sa mga mamamalit nga nagdala na og kaugalingon nilang reusable bags sa ilang pagpangompra bisan wala pa gipatuman ang Plastic Reduction Ordinance.