Food stalls sa VSU-Upper Campus, gipangtangtang na! – DYDC 104.7 FM
News

Food stalls sa VSU-Upper Campus, gipangtangtang na!

Anam-anam nang giguba ug gitangtang ang tanang food stalls sulod sa Visayas State University (VSU) Upper Campus karong semanaha.

Matod pa, kini tungod kay nangagabok na ang mga tindahan dinhi ug wala pay pihong schedule sa physical classes dinhi sa tunghaan.

 Sa usa ka facebook post ni VSU Web/Media Specialist Kim Roca, nakita ug nahulagway ang pagtangtang sa usa ka tindahan nga gipanag-iyahan ni Jamaila Pasilaban o mas nailhang Ate Mai.

Photo from Kim Roca’s Facebook Post

Nikanat ang maong post sa facebook nga aduna nay dul-an sa kwatro sentos  nag-share.

Ubay-ubay sa mga kaestudyantehan lakip na mga kawani sa VSU ang nipahayag og kasubo sa pagpangguba sa mga tindahan.

Sigon pa, nagsilbing preskong tambayan nilang mga estudyante samtang nagpaabot sa ilang mga klase ang tindahan ni Ate Mai ug sa uban pa.

Aduna sab nagsaysay nga daghan silag handumanan sa mga food stall dinhi sa VSU uban ang ilang mga amiga ug classmates samtang nangaon o nag-estambay lang.

Didto sad modagan ang mga kawani sa VSU kung bation og kagutom taliwala sa ilang trabaho ug mga okupante sa mga dormitoryo nga nagpuyo atbang lang sa mga tindahan.

Samtang, nahimong emosyonal si Ate Mai sa dihang nabasahan niya ang mga reaksyon sa facebook post bahin sa pagpangguba sa iyang tindahan. Matod pa niya, nakahilak siya sa mga shares sa facebook bahin niini.

Dugang pa niya, usa ka semana ang gihatag kanila para mangtangtang sa stalls.

Kahinumdoman nga sa milabayng tuig, gipasara ang mga kan-anan sa upper campus lakip na ang food court ug food stalls tungod sa pagbuto sa COVID-19 sa nasud.