Earth Day, gisaulog karong adlawa!

Gisaulog karong adlawa sa tibuok kalibutan ang Earth Day,  usa ka tinuig nga kalihokan matag Abril baynte dos sukad pa kaniadtong 1970 mil nwebe sentos setenta.

Tumong niining ipakita ang suporta alang sa pagpanalipod sa kinaiyahan.

Sa ika-51 nga anibersaryo niini karong tuiga, gipaubos ang kasaulogan sa temang“Restore Our Earth” diin pasiugdahan ang pagpataas og kahibalo sa tanan bahin sa mga kritikal nga isyu nga giatubang sa kinaiyahan ug ang dala niini sa ekosistema, biodiversity, pagkaon ug tubig, kahimsog sa publiko, mga industriya, ug mga komunidad.

Nunot niini, nagkadaiyang kalihokan online ang giandam sa mga ahensya ug organisasyon sa sulod ug gawas sa nasud.

Ang National Aeronautics and Space Administration kun NASA, ahensya sa estados Unidos nga responsible sa panukiduki sa kawanangan ug uban pa, gisaulog ang Earth Day pinaagi sa pagpahigayon og mga virtual activities diin mapakitang konektado kitang mga katawhan sa kalibutan.

Lakip na niini ang live presentations sa mga NASA scientists ug interactive chats uban ang mga Earth science experts.

Gi-highlight sad nila ang siyensya ug teknolohiya nga nagtabang ka nato aron padayong makalahutay dinhi sa kalibotan ug mopahiangay sa mga kabag-ohang natural nga nahitabo o tungod lang sad natong mga katawhan.

Sa laing bahin, nakigduyog sad ang nasud sa Pilipinas sa kasaulogan.

Nagtambabayong ang nagkalain-laing ahensya sa nasud sama sa Climate Change Commission, Department of Environment and Natural Resources, Department of Education, Department of Finance ug uban pa alang sa kasaulogan.

Adunay gipahigayong Webcast nga giuluhang PINASiglang Mundo diin gi-highlight ang kampanya sa nasud batok sa single-use plastics.

Samtang dinhi sa dakbayan sa Baybay, nagpahigayon ang mga kabatan-onan og coastal clean-up activity sa pagpanguna sa mga youth organizations dinhi.

Karon usab ang uwahing adlaw sa “Zero-Waste Challenge” tiktok video nga gipasiugdahan sa Baybay City Environment and Natural Resource Office.

Ipakita sa vlog ang lain-laing mga alternatibo aron malikyan ang paggamit og platik sa pagpangompra sa merkado ug uban pang establisemento dinhi, environment-friendly nga mga aktibid nga gibuhat sa partisipante apil na’ng mga kabag-ohang gi-aplikar nila sa ilang routine nga adunay kalabutan sa pag-amuma sa kinaiyahan.