Bagyo gawas sa PAR, mas mikusog!

Nahimo nang tropical storm ang tropical depression gawas sa Philippine Area of Responsibility (PAR) nga gibantayan kagahapon sa Philippine Atmospheric, Geophysical and Astronomical Services Administration kun PAGASA.

Ang maong tropical storm nga adunay international name nga “Surigae” nakita ganihang alas tres sa kahapunon sa 1,165 km sa Silangang dapit sa Mindanao, gawas sa PAR.

Gikan sa 5 km/h ganihang kadlawon, nikusog na kini ngadto sa 75 km/h sa maximum sustained winds niini ug niabot na sa 90 km/h ang paghuros sa hangin.

Apektado na sa trough o extension niini ang Mindanao karong higayona.

Gibanabana nga mosulod ang tropical storm sa PAR ug mahimo nang Typhoon karong umaabot Biyernes, Abril dise says. Kung musulod na, tawgon kini sa local name nga “Bising”, ang ikaduha nga bagyo sa nasud karong tuiga ug unang bagyo karong buwana.

Si Weather specialist Benison Estareja nagkanayon nga dili pa piho kung mo-landfall ang bagyo sa nasud tungod kay layo pa kini sa pagkakaron ug hinay pa sad ang paglihok niini.

Dugang pa niya, adunay posibilidad nga molihok kini duol sa Eastern Visayas ug Bicol Region. Posible usab nga mo-recurve kini padulong sa Amihan humang makasulod niini sa PAR ug posible nang dili mo-landfall.

Sa pagkakaron, padayong gimonitor sa ahensya ang mga kabag-ohan sa paglihok sa bagyo. (Perlyn Fernandez)