Medical frontliners sa VSU, nabakunahan batok sa COVID-19 – DYDC 104.7 FM
NewsNews

Medical frontliners sa VSU, nabakunahan batok sa COVID-19

Nakadawat na sa unang dosage sa AstraZeneca COVID-19 vaccine ang mga medical frontliners sa Visayas State University VSU niadtong Marso dise sais ning tuiga didto sa karaang building sa Western Leyte Provincial Hospital ning dakbayan sa Baybay.

Matud pa sa taho sa VSU website, ang unang batch naglangkub sa siyam ka mga medical frontliners gikan sa University Services for Health, Emergency, and Rescue kun USHER ning tunghaan kinsa ningpahimulos sa vaccination program sa nasudnong panggamhanan.

Laing hut-ong sa USHER staff ang gipadala sa WLPH niadtong Marso dise siyete aron mabakunahan. Sa kinatibuk-an, muabot sa duha ka medical doctors, usa ka dentist, pito ka nurses, ug laing walo ka USHER personnel ang nabakunahan.

Lakip sa mga nabakunahan sila si VSU resident physician ug USHER Haad Dr. Elwin Jay Yu, Dr. Merry Christ’l T. Guinocor ug si university dentist Dr. Maria Belen J. Buzon.

Ang ikaduhang dose sa AstraZeneca COVID-19 vaccine ihatag sa mga nabakunahan sulod sa duha ka buwan.

Sa iyang bahin, mapasalamaton si Dr. Yu sa lokal ug nasudnon panggamhanan sa paghatag og prayoridad sa mga medical frontliners sa maong national vaccination program.

Angayang masayran nga dyutay lang sa mga USHER staff nga nabakunahan ang nagpakitag mga sinyales sa pagkalipong pila ka minuto human nabakunahan. Apan gisiguro ni Dr. Yu nga normal lang ang maong mga side effects.

Nagpadayon ang local vaccination program sa Dakbayan sa Baybay diin prayoridad niini ang dugang mga medical frontliners sa siyudad sa mga musunod nga mga adlaw.

Ug mao kadto ang kinatibuk-ang balita nga napu-po sa atong DYDC-FM News Team karong taknaa. Mag-uban uban na sab kita sunod semana. Sa ngalan ni Perlyn Fernandez, ako si Buen Andrade para sa kalambuan news.