Easterlies, nagpasulabi gihapon sa nasud!

Easterlies o init nga hangin gikan sa Silangan pa gihapon ang nakaapekto sa Pilipinas nga hinungdan sa thunderstorms hilabi na sa Silangang bahin sa nasud.

Mao kini ang gibutyag ni DOST-PAGASA Senior Weather Specialist Shelly Ignacio sa ilang Public Weather Forecast nga gipagawas ganihang alas 4:00 sa kaadlawon.

Tungod sa Easterlies, ang dakong bahin sa nasud makasinati og panagsang mapanganuron ngadto sa madag-umon na kalangitan ug thunderstorms.

Sa musunod nga mga adlaw, wala pa gihapong nakitang Low Pressure Area ang DOST-PAGASA nga mahimong mo-debelop ngadto sa bagyo.

Si Ignacio nagkanayon nga maayong panahon pa gihapon ang ilang na-forecast sa  mga musunod nga adlaw apan gilaumang init ug alimuot ang panahon ug severe thunderstorms hilabi na sa hapon.

Karong adlawa, ang Luzon adunay panagsang mapanganuron nga kalangitan ug gilauman ang kalit apan dili lang usab magdugay nga pag-uwan.

Sa Visayas ug Mindanao, mainit ug alimuot gihapon nga panahon ang masinati samtang mapanganuron ngadto sa madag-umon na kalangitan inubanan sa mga pat-ak pat-ak na ulan ug pagpanugdug ug kilat tungod sa Easterlies. Gilauman gihapon ang dili lang usab magdugay nga localized thunderstorms.

Pahinumdom ni Ignacio nga mag-amping gihapon ang tanan hilabi na sa severe thunderstorms tungod kay possible ang tigda pagbundak sa uwan kung masinati kini ug possible usab ang mga pagbaha.

Sa forecast wind and coastal condition, gipasabot sa ahensya nga wala silay gipasakang gale warning maong gitugutan ra nga molayag sa kadagatan ug mangisda ang mga mangingisda. Apan possibleng mukusog ang hangin kung masinati ang thunderstorms.

Samtang, misubang ganihang alas 5:48 sa buntag si Haring Adlaw dinhi sa dakbayan ug mosalop kini unyang alas 5:49 sa hapon.

Perlyn Fernandez, Kalambuan News.