Tinuig nga Christmas Lighting Ceremony sa VSU, gipahigayon taliwa sa COVID-19
Bisan pa man sa krisis sa COVID-19 Pandemic sa tibuok kalibutan, wala kini nakapugong sa Visayas State University (VSU) nga ipahigayon ang tinuig nga tradisyon sa pagpasiga sa mga Christmas Lights agi’g pagsenyas sa pagsugod sa Chistmas Season sa tunghaan kun #PaskoSaVSU.
Gipahigayon kagahapon Disyembre uno sa alas sais sa gabie ang lighting ceremony diin gipasiga sa pinaka-unang higayon ang mabulukon nga Christmas Tree, Christmas Belen ug mga Christmas décors sa Main Entrance ning tunghaan.
Apan lahi sa mga nanglabay’ng katuigan, ang lighting ceremony karong tuiga wala gitambongan sa gatusan ka mga manan-away tungod sa gipatumang health protocls, physical ug social distancing, ug ginadili nga mass gathering nunot sa hulga sa COVID-19.
Hinuon, naka-sentro ang maong aktibidad sa Virtual Lighting Ceremony diin gi-awhag ang mga tawo nga mutan-aw na lang sa live streaming sa ilang mga smartphones ug laptops.
Bisan pa man niini, nagmabungahon ug nagmabulukon ang maong seremonya nga pisikal nga gitambungan ni VSU President Dr. Edgardo E. Tulin, mga opisyales sa tunghaan, ug pipila ka mga kawani ug magtutudlo.
Naa usay pipila ka mga manan-away ang pisikal nga ming-adto sa VSU Main entrance aron sa pagsaksi sa Lighting Ceremony. Gisugdan ang kalihukan pinaagi sa pag-ampo ni Fr. Gary Esguerra kura paroko sa Holy Spirit Parish sa VSU, diin gisundan kini sa mensahe ni Dr. Tulin, ug ang pagpasiga sa mga suga.
Sa iyang mensahe, gibutyag ni Dr. Tulin nga bisan pa man sa mga pagsuway ug kalisdanan nga naagi-an sa tanan tungod sa pandemya, anaa gihapoy lugar aron sa pagsaulog sa pasko nga mao ang adlaw sa pagkatawo ni Hesukristo. Kini usab nagsimbulo sa paglaum ug ang pasko panahon sa paghigugmaay ug paghinatagay.
Gawas pa sa Christmas Lighting Ceremony, gipahigayon usab ang judging sa Parol-Making Contest diin ang mga mananaog sa tulo ka kategorya makadawat og tag singko mil pesos (P5,000) ug anaay tag usa ka libo ka pesos (P1,000) nga consolation prize.
Padayon nga pasigaon ang mga Christmas Lights sa tibuok buwan sa Disyembre. (Buen Josef Andrade)
