DYDC-FM, naglunsad og kampanya alang sa mga biktima sa lunop sa Cagayan
Naglunsad og fundraising campaign ang Visayas State University (VSU) DYDC-FM 104.7 MHz, pinangulohan sa station manager niini nga si Dr. Christina A. Gabrillo, aron makatigom og pondo alang sa relief operations sa Tuguegarao City, Cagayan. Kini human naigo ang mga probinsya sa Cagayan ug Isabela sa mga pagbaha nunot sa Bagyong Ulysses.
Gisugdan ang “Tabang Para sa Cagayan: A Fundraising Campaign” niadtong Nobyembre dise sais ning tuiga pinaagi sa usa ka Facebook Live. Gibutyag ni Dr. Gabrillo nga ang matigom nga pondo ihatag sa usa ka organisasyon didto sa Tuguegarao City nga nang-apudapod og pagkaon sa muabot usa ka libo ka indibidwal sa siyam ka evacuation centers sa siyudad.
Padayon nga mudawat og cash donations ang DYDC-FM hangtod sa alas dose ang takna sa udto sa adlaw’ng Miyerkules, Nobyembre dise otso ning tuiga. Pormal nga ipadala ni Dr. Gabrillo ang kinatibuk-an nga matigom nga pondo sa benepisyaryo didto sa Tuguegarao City sa Miyerkules sa hapon.
Sa pinaka-uwahing pagbana-bana ni Dr. Gabrillo, muabot na sa baynte otso mil pesos (Php28,000) ang mga cash donations ug pledges sa mga donors sa sulod ug gawas sa nasud. Isip pagsunod sa transparency, i-post sa FB Page ug website sa DYDC-FM ang mga cash donors human sa maong fundraising campaign. Makadawat usab og acknowledgement receipt ang donor isip pagmatuod nga nadawat sa DYDC-FM ang iyang donasyon.
Gidasig ni Dr. Gabrillo ang mga katawhan nga muduyog sa proyekto aron makatabang sa mga kaigsuonan sa Cagayan Valley nga apektado sa pagbaha ug anaa pa sa mga evacuation centers. Mapasalamaton usab kini sa mga naghatag na ug nagpledge og pinansyal nga tabang.
Sa mga buot pa nga mutabang, mamahimong ipadala ang ilang donasyon sa ilang piling cash remittance center:
DYDC-FM c/o Carmela A. Yamada
09214105070 – SMART
09458539549 – GLOBE
Mamahimo usab nga magpadala ang mga donors sa gawas sa nasud pinaagi sa Western Union.
Kahinumduman nga ming-igo ang Typhoon Ulysses (International Name: Vamco) niadtong Nobyembre dose sa dakong bahin sa Luzon diin gibaha ang National Capital Region (NCR) ug mga silinganang probinsya niini.
Niadtong Nobyembre trese, naigo sa dakong pagbaha ang Cagayan Valley diin nahimutang ang mga probinsya sa Cagayan ug Isabela nunot sa way hunong nga pag-uwan nga dala ni Typhoon Ulysses. Gi-ablihan usab ang Magat Dam sa Isabela tungod sa pagtaas sa lebel sa tubig nga lapas na sa critical level niini hinungdan sa pagbaha sa mga ubos nga bahin sa probinsya. Nunot usab sa siltation sa mga sapa, lisod ang pag-agas sa tubig hinungdan sa hinay nga paghunob sa baha.
Sa pinakauwahing tala sa National Disaster Risk Reduction and Management Council (NDRRMC), muabot na sa 67 ang kinatibuk-ang namatay tungod sa bagyo, baynte dos (22) niini ang gikan sa Cagayan Valley.
