VSU, adunay bag-ong health protocols nga gipagula!
October 27, 2020
Adunay bag-ong gipagawas nga mga health protocols batok sa COVID-19 ang tunghaan kagahapon.
Kini human nga temporaryong gi-lockdown ang VSU kaniadtong Oktubre baynte uno hangtod baynte kwatro tungod sa padayong verification ug testing sa Inter-Agency Task Force on Emerging Infectious Diseases ug University Services for Health, Emergency and Rescue (USHER) sa padayong pagkatap sa COVID-19 sa dakbayan.
Ubos sa Memorandum Circular No. 98 o Health Protocols against COVID-19 ang mga musunod:
Una ang entry o ang pagsulod sa VSU Campus.
Matod pa, mga residente ug trabahante lang sa VSU ang gitugutang makasulod sa campus lakip na ang mga kawani Visca Foundation Elementary School ug sa mga research centers nga Agricultural Training Institute, Philippine Carabao Center.
Samtang, ang tanang empleyado gikan sa Brgay. Pangasugan ug Barangay San Agustin, temporaryong gidumiliang musulod sa VSU.
Tungod kini sa nagkadaghan nga mga kaso sa COVID-19 didto maong ang mga empleyado apil na ang mga Job Order Workers gikan didto, padayon nga magtrabaho sa ilang mga panimalay o mag-work from home hangtod sa Oktubre traynta ning tuiga o hangtod sa musunod nga memo o pahibalo nga ipagawas sa mga tigdumala sa VSU.
Kagahapon, Oktubre baynte says, mibalik sa opisina ang mga kawani sa tunghaan ug gipahinumdumang hingpit nga tumanon gihapon ang minimum health protocols sa mga buhatan sama sa pagsul-ob og facemask, kanunay nga paghugas o pagsanitaize sa mga kamot ug ang social distancing.
Samtang, ang mga kawani nga adunay close contact sa mga kompimado o suspected COVID-19 patients, kinahanglang mo-koordinar sa USHER o sa City Health Office ug gilayong mag-self quarantine sulod sa katorse ka adlaw ug ipadayon kini bisan pagkahuman nga madawat ang negatibo nga resulta sa RT-PCR Test Result.
Sa laing bahin, ang mga nurse, ang driver sa ambulansya sa USHER ug ang mga security guard gimandoang magpabilin sa nakataganang puluy-anan nila sa campus sa sa tibuuk nga gidugayon sa memo hangtod sa Oktubre trayntay uno.
Padayon usab nga nagpahinumdom si VSU President Edgardo Tulin sa tanan nga mahimong mas maigmaton ug mas mahimong disiplinado sa pagsunod sa mga protocols nga gipatuman sa LGU-Baybay ug sa VSU ug giaghat usab ang tanan nga mahimong bahin sa solusyon sa krisis sa kahimsog nga nasinati sa kalibutan karon.
