VSU, nakigduyog sa pagsaulog sa Philippine Civil Service Anniversary 2020!
September 8, 2020
Nakigduyog ang Visayas State University kun VSU sa pagsaulog sa ika-syento baynte nga anibersaryo sa Civil Service Commission (CSC) sa tibuok nasud.
Pormal nga giablihan sa tunghaan ang kasaulogan kagahapon, Setyembre syete, pinaagi sa pagpahigayon og virtual opening ceremony, isip pagsunod sa new normal.
Sa maong virtual ceremony, gipresentar ang bag-ong mga trabahante ug bag-ong napromote nga mga department head, membro sa faculty ug administrative staff sa VSU.
Tibuok buwan sa Setyembre saulogon ang Philippine Civil Service Anniversary (PCSA) ubos sa tema niini nga “Public Sector Age of Digital Transformation”.
Sa iyang mensahe, gidayeg ug gipasalamatan ni VSU President Edgardo Tulin ang tanang civil servants hilabi na sa VSU sa ilang serbisyo bisan pa man sa panahon sa pandemya.
Gibutyag usab ni President Tulin nga usa ka hagit alang sa mga public servants ang digital transformation sa pagtanyag og serbisyo sa mga kliyente.
Bisan pa man, wala kini nakapatandog sa mga public servants sa ilang pagserbisyo kay hinay-hinay kining gigakus.
Kini tungod kay ang mga produkto sa digital transformation sama sa MS Word, Excel, Powerpoint ug uban pa nakatabang nga mas mapadali ug mapagaan ang kinabuhi ug ang ilang mga buluhaton.
Samtang, aduna usab webinar series bahin sa kahimsog nga pagadumalahan sa University Services for Health, Emergency, and Rescue (USHER) alang sa mga magtutudlo ug kawani sa unibersidad.
Gawas pa sa webinar, ipahigayon usab sa USHER ang ilang health and wellness activities matag adlaw sa Miyerkules karong buwana.
Lakip sa mga nakalinyang aktibidad nila ang Blood Pressure Taking, Height and Weight (BMI) ug Health Teaching on DIABETES MELLITUS, HYPERTENSION and OBESITY sa alas otso hangtod sa alas dyes sa buntag ug alas tres hangtod alas singko sa hapon didto sa VSU Ecopark.
Dugang pa, moapil usab ang tunghaan sa CSC Online Job Fair karong umaabot Septyembre dise otso, diin itanyag ang mga bakante nga trabaho sa CSC Manila Office ug abli nga mga posisyon dinhi sa VSU Main Campus sa pagpanguna sa University Integrated Media Center.
Nasayran nga tapuson sa VSU ang kasaulogan sa PCSA pinaagi sa pagpahigayon og Virtual VSU Family Day ug Culmination Program sa Septyembre 25 diin pasidunggan ang mga faculty members ug mga administrative staff nga nakaangkon og Loyalty Award tungod sa dugay nilang serbisyo ug dili matarug nga dedikasyon sa unibersidad.
