Kondisyon sa COVID-19 sa Rehiyon otso, arang-arang pa gihapon!

Maayo pa gihapon ang kondisyon sa lalawigan sa Leyte o sa rehiyon otso taliwala sa giatubang karon nga kalisdan gumikan sa COVID-19.

Mao kini ang gibutyag ni Leyte Vice Governor Atty. Carlo P.  Loreto atol sa programang Pamalihug Sibya sa DYDC-FM karong adlawa, Agosto dyes, ning tuiga.

Matod pa ni Vice Governor Loreto, niadtong buwan sa Mayo sa ilang National Level Meeting, gilaumang moabot sa kwarenta mil ang maapektuhan o magpositibo sa COVID-19 sa Rehiyon otso.

Samtang otso syentos ang ilang nakitang mamatay gumikan sa maong virus.

Apan, nadasig siya tungod kay wala kini mahitabo sa rehiyon.

Sumala pa sa bise-goberbador, kapin usa ka libo ang nataptan sa maong sakit sa rehiyon ug tulo ang mga nakalasan og kinabuhi tungod niini.

Ubos kini kung itandi sa mga nilubong kaso sa COVID-19 sa ubang rehiyon hilabi na sa gilauman nilang kinatibuk-ang kaso niadtong Marso.

Gitataw niyang tungod kini sa interbensyon nga gihimo sa gobyerno ug mga lungsod apil na ang mga pribadong indibidwal ug sa pagpakighiusa sa mga molupyo sa pagsunod sa mga health protocols nga gipatuman isip pagpakgang sa COVID-19.

Si Vice Governor Loreto nagkanayon usab nga kung ma-mintinar kini, dili na maabot pa sa grabe nga kondisyon sa sakit ang Leyte ug rehiyon otso hilabi na karong anaa na sa final phase ang vaccine testing alang sa COVID-19.

Nunot niini, iyang gipasalamatan ang mga municipal city ug barangay officials ug frontliners sa ilang mga sakripisyo lakip na ang mga anaa sa media kay adunay usab daw silay dakong bahin sa pag apod-apod sa mga impormasyong kinahanglan masabtan sa publiko.

Sa laing bahin, siya miingon nga wala pa gihapon gilauman ang pagdaghan sa mga turistang mobisita tungod sa kapeligroso sa pagbyahe karong panahona.

Apan padayong gi-promote ang turismo sa lalawigan ug sa rehiyon pinaagi sa pagpost online sa mga tourist spots ug delicacies o mga lamian nga pagkaon niini.

Samtang sa agrikultura, namatyagan niyang nisaka ang demand sa pagkaon ug kusog usab produksyon sa sector dinhi. Apan, padayon niyang gi-awhag ang tanan nga magtanom, o itanom ang mga liso sa ilang pagkaon, aron masiguro ang seguridad sa pagkaon sa mga musunod nga panahon.