Proyekto aron masiguro ang seguridad sa pagkaon, gilunsad sa VSU! – DYDC 104.7 FM
NewsNews

Proyekto aron masiguro ang seguridad sa pagkaon, gilunsad sa VSU!

June 19, 2020

Padayong nasinati sa mga katawhan ang epekto sa krisis sa kahimsog tungod sa Coronavirus (COVID-19).

Nunot niini, gawas sa pagprotektar sa mga nag-antos niini hilabi na ang mga frontliners, nahimo usab nga prayoridad sa nasud ang pagseguro nga aduna gihapoy makaon ang mga molupyo samtang anaa pa ang pandemya.

Atol sa DYDC Special Talk kang Vice President for Research and Extension Dr. Othello B. Capuno dinhi sa Visayas State University kun VSU, aduna gihapoy mga lakang ang tunghaan isip tubag sa seguridad sa pagkaon karong panahon sa pandemya.

Si Dr. Capuno nagkanayon nga ilang gilunsad ang proyektong #OplanTanom o Intensifying Vegetable Production to Mitigate Crisis Brought by COVID-19 gamit ang mga teknolohiya sa pagpananom sa VSU.

Gipangunahan ang proyekto ni VSU President Edgardo E. Tulin uban ni Dr. Capuno, Dr. Rosario Salas ug Dr. Zenaida Gonzaga sa Department of Horticulture (DOH).

Tumong sa maong proyekto nga masuportahan ang mga empleyado sa tunghaan, mga na-stranded nga mga estudyante, mga frontliners, partner nga mga ahensya sa VSU sa Tacloban, Samar, Southern Leyte, Biliran ug uban pa, ingon usab ang mga kabus nga pamilya gikan sa mga kasikbit nga mga barangay pinaagi sa paghatag kanila og libre nga suplay sa utanon.

Dugang pa, gitinguha usab niini nga makatabang sa pagpalig-on sa ilang mga resistansya batok sa virus.  

Sugod niadtong buwan sa Marso, nakaani na sila og kapin tres punto singko tonelada nga mga utanon sama sa ampalaya, okra, batong, upo, talong, kamatis, kangkong, kalabasa, ug uban pa.

Nakadawat niini ang mga kawani sa tunghaan hilabi na ang mga frontliners sa matag semana.

Dugang pa, syento dyes ka kilo sa mga utanon ang gipang-apod-apod na sa matag barangay sa Pangasugan, Patag ug Guadalupe samtang matag usa ka gatos ka kilo ang nahatag na sa ubang mga partner nga mga ahensya sa VSU.

Matod pa usab ni Dr. Capuno, sa singko mil nga target nga mga benepisyaryo niini, tres mil kinyentos na ang nakapahimulos sa maong proyekto.

Gitinguha nila karon nga makaprodyus pa og onse hangtod sa kinse tonelada ug mahatag kini ngadto sa syete mil pa ka mga pamilya.

Ubos usab sa proyekto, naghatag usab silag mga himsog nga mga seedlings sa mga benipisyaryo nga buot magtanom sa ilang mga panimalay.

Mahuman ang proyekto sa buwan sa Disyembre apan naghinaot ug paningkamutan nila nga magpadayon pa kini bisag mahuman na ang pandemya tungod sa maayong resulta niini.

Mahimong tan-awon ang bug-os nga video sa maong edisyon sa https://www.facebook.com/vsudydcfm104.7/videos/3190403584348642/.

Gituki usab didto ang uban pang negatibo nga epekto sa COVID-19 sa seguridad sa pagkaon ug uban pang hagit nga nasinati nila sa OVPRE sa pagpatuman og mga panuki-duki ug uban pa.