Enrolment sa VSU, nagsugod na – DYDC 104.7 FM
News

Enrolment sa VSU, nagsugod na

Human sa selebrasyon sa holiday season, hinay-hinay na’ng nibalik ang mga estudyante sa Visayas State University kun VSU alang sa enrolment sa umaabot nga semestro.

Ang enrolment sa Academic Year 2019-2020 Second Semester nga gisugdan karong adlawa, Enero 6, pagasugdan og online process ug sundan sa uban pang pisikal nga proseso nga mahitabo sa VSU Convention Center.

Apan pugngan nga maka-enrol online ang kadtong mga estudyante nga dunay mga deficiency o kakulang.

Kinahanglan usa nila nga i-clear ug i-reset ang ilang accounts sa Registrar’s Office usa sila maka-enrol online.

Angayang masayran nga sa milabayng semana, gipahinumduman ni VSU Vice President for Instruction, Dr. Beatriz Belonias ang mga kawani sa tunghaan sa pagsumite sa mga grado sa estudyante sa unang semestro hilabi na ang kadtong mga subjects nga prerequisites sa higher courses.

Alang sa tibuok lista sa mga estudyante o accounts nga na blocked sa online enrolment, mahimong mobisita sa VSU website nga vsu.edu.ph

Mahimo usab nga makit-an sa website ang block schedule, departamental schedule ug ang tibuok nga proseso sa enrolment sa ikaduhang semestro.

Alang usab sa mga kabalaka ug pangutana kabahin sa “myVSU Student Portal” mahimo usab nga mobisita sa support.vsu.edu.ph.

Angayang masayran nga gibahin sa duha ang enrollees alang sa general registration.

Gikonsiderar isip regular ang estudyante kung mokuha siya og mga subjects base sa iyang course prospectus ug wala siya’y dili kompleto o hagbong nga grado sa mga subjects nga prerequisite sa iyang kuhaon karon nga semestro.

Sa laing bahin, isipon nga irregular ang usa ka estudyante kung dili siya mokuha sa mga subjects base sa iyang course prospectus ug kung duna siya’y dili kompleto o hagbong nga grado sa mga subjects nga prerequisite sa iyang kuhaon karon nga semestro.

Nagsugod karong adlawa ang maong enrolment alang sa mga First Year ug mosunod ugma, Enero 7 ang mga Second Year.

Sa Miyerkules, Enero 8 mao ang enrolment schedule sa Third Year ug sa Huwebes, Enero 9 ang sa Fourth, Fifth ug Sixth Year.

Samtang karong Biyernes, Enero 10 ang sa graduate students (on campus) ug magsugod karong adlawa hangtod Enero 31 ang sa extramural, annual scheme.

Sa pagpanguna sa Registrar’s Office, University Student Services Office, Web Team ug Cumulus One, padayon nga naningkamot ang VSU nga makahatag og mas sayon ug paspas nga serbisyo alang sa mga estudyante.

Danica Godinez, Kalambuan News.