Dyes Mil Pesos, pwedeng maangkon sa Quiz Show sa USSC!
Ipahigayon ang pinaka-unang General Information Quiz Show nga gipasi-ugdahan sa University Supreme Student Council kon USSC dinhi sa Visayas State University (VSU) karong umaabot Biyernes, Nobyembre otso, dos mil dise nwebe sa alas singko sa hapon didto sa VSU Gym.
“Winner takes all!” ang tema sa maong Quiz Show diin adunay tsansa nga maangkon ang ganting dyes mil pesos nga giandam sa USSC sa mudaog sa indigay sa utok.
Matod pa sa USSC, tumong sa kalihukan nga maghatag og kalingawan sa mga magtutungha sa VSU pinaagi sa pagpahigayon og puno sa impormasyon nga kalihukan.
Atol sa pagpakighinabi sa DYDC-FM News Team ni VSU Student Regent ug USSC President Chad Christian Wales, iyang gibutyag nga langkuban ang quiz show og tulo ka qualifying rounds, ang difficult, extreme ug impossible. Aron masuta ang mananaog, aduna silay Godlike final round diin lima ka teams ang adunay tsansa nga makasulod.
Nunot niini iya gihatagan og tips ang mga mo-register sa klase sa mga pangutana nga mogawas sa quiz show.
Abli ang quiz show sa tanang mga undergraduate nga mga magtutungha lakip na ang mga satellite campuses sa VSU Isabel, Alangalang, Tolosa ug Villaba nga makaangkon og libre nga pagkaon ug accommodation.
Samtang, gitataw sa USSC nga limitado lang sa tulo ka grupo ang makasalmot sa matag college.
Ang matag grupo usab kinahanglang adunay tulo ka membro.
Nasayran nga aron makaapil sa quiz show, kinahanglang andamon ang mga rekisitos nga gilangkuban sa ilang Certificate of Registration (COR), nabalidar nga student identification card (ID) ug resibo sa registration fee nga ila bayaran sa ilang College Supreme Student Council (CSSC).
Isumiter kini sa mga interesadong moapil sa ilang mga college council sa Miyerkules, Nobyembre says.
Dugang pa, aduna usab higayon nga makadawat og premyo sama sa school supplies ang mga manan-aw kung makatubag sa mga surprise questions nga ihatag kanila sa USSC.
Alang sa team nga modaog sa first place, makadawat usab sila og certificate ug medals gawas sa dyes mil ka pesos, samtang ang mga modaog sa second ug third place, makadawat usab og medals ug certificates.
Busa, giimbitahan ni Wales ang mga magtutungha sa VSU nga moapil sa quiz show.
Perlyn Fernandez, Kalambuan News.
