Mga pagpamutol sa kahoy alang sa road widening sa VSU, gipasabot

Gipasabot karon ni Visayas State University VSU President Dr. Edgardo Tulin sa tibuok VSU community nga hapit nang muabot sa katunga ang natrabaho sa road widening project sa Department of Public Works and Highways DPWH sa tunghaan.

Sa usa ka post sa Social Media ni Dr. Tulin, iyang gibutyag nga anaa gihapoy mga kahoy nga masakripisyo ug putlon sa maong road widening project sa DPWH. Sa maong proseso, kinahanglan gihapon nga putlon ang pipila ka mga kahoy alang sa loading ug unloading zones sa VSU market.

Kahinumduman nga sa milabay’ng tuig, gisugyot sa DPWH nga dili na palaparon ang daan nga dalan apan magdugang hinuon og lain pang lane sa pikas bahin aron nga malikayan ang pagputol sa mga kahoy.

Kini human sa pag-apela ni kanhi VSU President Pacencia Milan nga nagpresentar og alternatibong plano nga sibo sa landscape sa tunghaan.

Gikan sa Dakbayan sa Baybay, ang umaabot nga four-lane highway sa Brgy, Guadalupe magbulag human sa Lagu-lago bridge atbang sa Holy Spirit Parish nga magporma og median islands diin nahimutang ang mga punuon sa kahoy.

Ang bag-ong dalan magpadayon subay sa VSU market ug main gate ug ilangkob pag-usab sa daan nga dalan usa ang Calbiga-a bridge sa Brgy. Pangasugan.

Tungod niini, magputol usab og pipila ka kahoy sa maong mga dapit. Apan gisiguro sa tunghaan nga minusan sa DPWH ang gidaghanon sa mga kahoy nga putlon.

Matod pa ni VSU Professor Emeritus Manuel Palomar sa milabayng tuig, gantihan sa Department of Environment and Natural Resources kun DENR og usa ka gatos nga tree seedlings ang matag punoan nga giputol.

Maghatag usab ang ahensya og pondo alang sa pagtanom sa mga kahoy ug maintenance niini sulod sa tulo ka tuig.

Angayang masayran nga kini subay sa paningkamot sa VSU sa pagpreserbar sa kalikopan nga giila sa Environmental Educational Network of the Philippines isip “dark green school”.

Danica Godinez, Kalambuan News