USSO, naghatag og mga tips aron mahimong maayong digital citizens ang mga estudyante!

Subling gipahinumdoman sa University Student Services Office kun USSO dinhi sa Visayas State University (VSU) ang tanang mga magtutungha nga mahimong maayong digital citizens online.

Digital citizen ang tawag sa usa ka indibidwal nga nakaangkon og kahibalo ug kahanas aron epektibo nga magamit ang digital technologies.

Atol sa sinemanang programa sa USSO nga Serbisyo Estudyante dinhi sa sibyaanan, gibutyag nila Guidance Counselors Chona Brit ug Juanito Panonce nga nalambigit ang digital citizenship sa digital wellness ug digital ethics.

Gitataw nila nga gihulagway niini ang sakto nga mga pamatasan nga angayang buhaton o ipakita online ug mga butang nga angayan natong ipasunod sa musunod nga mga henerasyon.

Nunot niini, ilang gibutyag ang pipila sa mga sukaranan ug mga skills nga angayan nga maangkon sa maayong pagkalungsoranon sa digital nga kalibutan.

Sigon pa nila, kinahanglang masayod ang tanan sa pagpangita, pagdumala ug pagtipig o pagsave sa mga impormasyon ug digital content. Ubos niini, angayan nga makat-onan ang mga technical terms pananglitan ang terminong search engine.

Angayan usab nga masayran ang pakigkominikar sa mga magtutudlo ug mga kauban online, pag-apil, pakigtambayayong o pagtabang sa mga virtual activities ug pagpakig-ambit sa mga impormasyon gamit ang email ug instant messaging sama sa facebook messenger.

Gipaambit usab nila nga angayang masayran usab ang pagpamalit ug pagpamaligya o pagtanyag og mga produkto ug serbisyo online hilabi na karon nga sagad mag-online shop ang mga katawhan aron makalikay sa COVID-19.

Nunot niini, dapat nga dumalahan og maayo ug i-organisar ang salapi o finance.

Giaghat usab nilang mukuhag kasulbaran ug solusyon sa mga problema pinaagi sa digital tools.

Pananglitan niini ang pagtudlo sa kaugalingon gamit ang mga tutorial videos sama sa hair styling, gardening ug uban pang mga life hacks sa mga ordinaryong mga problema nga mahimamat.

Sa ilang mga nahisgutan, gihatagan gibug-aton nila ang fundamental skill nga buot nilang masagop sa tanan.

Mao kini ang pagmugna og mga digital content aron makaapil sila sa digital nga mga komunidad ug organisasyon.

Nunot niini, gisugyot nilang mogama sila og opisyal nga mga account aron bisag layo man, pormal nga maabot gihapon ang mga mgatutudlo, mga kliyente, mga partner nga mga organisasyon ug uban pa.

Sa mga organisasyon ug mga online sellers, mahinungdanong buhaton kini aron dili masagol sa opisyal nga account ang mga ilang mga personal nga mga post, mensahe ug uban pa.