Pinakaunang ‘Sportsfest’ sa Sampaguita Ladies Hall, nagmalampuson!

Sampaguita Ladies’ Hall (Photo from Sampaguita FB Page)

Nagmalampuson ang pinakauna’ng sportsfest sa Sampaguita Ladies Hall nga gipahigayon niadtong Pebrero baynte tres hangtod Pebrero baynte kwatro ning tuiga.

Gipasiugdahan ang Sampaguita Sportsfeast sa adviser ug assistant advisers niini, mga opisyales ug mga student assistants kauban na ang mga Music, Arts, Physical, Education and Health (MAPEH) majors sa Institute of Human Kinetics (IHK) dinhi sa Visayas State University (VSU).

Ang maong kalihukan adunay temang “Building Sports, Building Goals” diin kadaghanan sa mga okupante sa dormitoryo ang nisalmot niini.

Ang mga entrante gibahin ug tulo ka hugpong, ang Green Archer nga naglangkob sa tanang okupante nga anaa sa first level ug fourth level sa Sampaguita Dormitory, Blue Eagles sa mga residente sa second level sa dormitory ug Growling Tigers nga anaa sa third level.

Ang sports feast gilangkuban og mga nagkadaiyang mga indigay sama sa Basketball, Volleyball, Frisbee ug Futsal alang sa major events ug sa minor events sama sa Lawn Tennis, Table Tennis, ug Board Games sama sa Chess, Word Factory ug Scrabble.

Nakuha sa Growling Tigers ang trono isip Over- all Champion sa maong sportsfest.

Tungod niini madawat nila ang ilang incentive nga one week free cleaning ug certificates. Aduna usay mga medals ug certificates nga nadawat ang mga nidaog sa individual, dual ug team sports.

Atol sa pagpakighinabi sa DYDC- FM News Team ni IHK Instructor ug Sampaguita Assistant Adviser Ma. Elena Guy-ab, siya nagkanayon nga tumong sa Sampaguita Sports Feast ang panaghiusa ug panag-higalaay sa mga okupante pinaagi sa mga dula tungod kay halos wala na kini magkailhanay tungod sa kadaghan nila. Tumong usab niini nga maghatag og kasadya ug kalingawan sa mga okupante bag-o pa moabot ang Midterm Examinations.

Mapasalamaton usab si Guy-ab sa mga naghatag og tabang aron mahimong possible ang pinaka-unang sportsfeast sa Sampaguita Ladies Hall.

Angayang masayran nga ang pondo nga gigamit sa mao’ng kalihukan lakip na ang ambulance fee sa VSU Hospital gikan sa gamay’ng kontribusyon sa mga okupante sa Sampaguita Ladies Hall.

Ang Sampaguita Ladies Hall ang pinakadako’ng dormitoryo sulod sa VSU campus nga adunay dos syentos setentay dos nga maximum resident capacity.

=====

Perlyn Fernandez, Kalambuan News.

Leave a Reply

Your email address will not be published. Required fields are marked *